Џихадистичката група Исламска држава (ИД) воспостави целосна контрола врз градот Рамади, нанесувајќи им тежок пораз на ирачките безбедносни сили и покрај воздушните напади на меѓународната коалиција, предводена од САД, пренесе МИА.
ИД соопшти дека заробила тенкови и убила десетици припадници на безбедносните сили.
Низ улиците во градот, кој е престолнина на провинцијата Анбар, можеле да се забележат голем број мртви тела. Според локалните власти, групата извршила масовни убиства врз ирачки војници и мирни жители.
– Рамади падна. Градот е целосно преземен, а армијата бега, изјавил гувернерот на Анбар.
При бегството безбедносните сили оставиле оружје и оклопни возила.
Пентагот, пак, соопшти дека ги следи информациите за борбите во Рамади, додавајќи дека ситуацијата е „променлива“ и покрај тврдењата на ИД дека воспоставила целосна контрола врз ирачкиот град.
– Многу е рано во овој момент да се даваат категорични изјави за состојбата таму, истакна портпаролка на американското Министерство за одбрана.
Пентагон наведува дека ИД „има предност“ во судирите во Рамади и доколку градот биде освоен меѓународната коалиција ќе ги поддржи ирачките сили за да ја вратат контролата.
Преземањето на Рамади е најголемата победа на ИД во Ирак и најтежок пораз за ирачката војска од минатото лето, кога групата започна офанзива, при што зазеде значителни територии од земјата.