Исламот не е дел од Германија

Новиот германски министер за внатрешни работи, Хорст Зехофер порача денеска дека „Исламот“ не е дел од Германија. Германија е христијанска земја, а со тоа одат слободните недели, црквените празници како и ритуалите за Велигден, Божиќ и други празници, истакнал Зехофер.

Изјавата на новиот министер за внатрешни работи е во спротивност со пораката на поранешниот германски претседател, Кристијан Вулф кој во 2010 година ја покрена дебата за мигрантите изјавувајќи дека „Исламот е дел од Германија“. Истата реченица на Вулф во 2015 година ја повтори и канцеларката Ангела Меркел за врема на протестите на групата „Пегида“ против исламизацијата на Европа.

– Муслиманите кои живеат кај нас нормално дека се дел од Германија, но не значи дека поради тоа треба да се откажеме од нашите традиции и обичаи- истакнал Зехофер.

Зехофер, кој е лидер на Христијанско-социјалната унија, баварска сестринска партија на демохристијаните на Меркел, најави одрќување на конференција за исламот за да се расправа за проблемите на интеграција на муслиманите.

– На муслиманите им порачувам дека мораат да живеат со Германците, а не поред или против нив. За да го постигнеме тоа неопходно е меѓусебно разбирање, а тоа може да го постигнеме само ако разговараме- рекол Зехофер.

Тој најави отворање на централни прифатни центри во кои барателите на азил, по нивното доаѓање во Германија, би биле сместени додека не се одлучи за нивната молба.

 

Доколку преземете содржина од оваа страница, во целост сте се согласиле со нејзините Услови за користење.