Иванов: Договор за името кој нема да предвидува промени на Уставот

Зачувувањето на уставното име и изнаоѓањето на решение кое нема да предизвика уставни промени, во никој случај не е насочено против интеграцијата на Република Македонија во Европската унија и НАТО, се истакнува во реакцијата од кабинетот на шефот на државата Ѓорге Иванов на информациите дека премеирите Зоран Заев и Алексис Ципрас во синоќешниот телефонски разговор постигнале договор за името на Македонија за надминување на деценискиот спор кој Грција го има со името на нашата земја.

Кабинетот Иванов, оценува дека вчерашната изјава на претседателот на Владата дадена во емисијата „Топ Тема“, дека евентуалното отфрлање на договорот со Грција ќе ги загрози перспективите на Република Македонија за влез во ЕУ и НАТО и зголеми внатрешните опасности претставува „очаен обид“ за манипулација на јавноста и наведување на македонските граѓани во пресрет на евентуално референдумско изјаснување.

„Стратешките определби на Република Македонија за членство во Европската унија и во НАТО се јасно дефинирани и непроменети. Зачувувањето на уставното име и изнаоѓањето на решение кое нема да предизвика уставни промени, во никој случај не е насочено против интеграцијата на Република Македонија во Европската Унија и НАТО. Склучувањето на меѓународен договор содржан во еден или повеќе поврзани меѓусебни документи треба да биде во согласност со Уставот на Република Македонија, а не да предвидува негова измена“, се истакнува во реакцијата од кабинетот на Претседателот Иванов.

Во врска со повикот на премиерот Заев за поддршка на евентуалниот договор од страна на сите политички чинители, претседателот Иванов уште еднаш укажува дека е потребен широк национален консензус за изнаоѓање решение кое нема да го наруши достоинството на македонскиот народ и граѓаните.

Претседателот Иванов смета дека е „несериозно и неодговорно“ прашањето за името, кое е исклучително важно прашање за граѓаните на Република Македонија, и наметнати технички барања, да се решаваат телефонски и по пат на личен договор меѓу премиерите на двете држави.

Доколку преземете содржина од оваа страница, во целост сте се согласиле со нејзините Услови за користење.