Претседателот на Република Македонија, Ѓорге Иванов, во неделата го прими амбасадорот Метју Нимиц, специјален пратеник на генералниот секретар на Обединетите нации за прашањето за разликата околу името и на средбата беше разгледана актуелната состојба во разговорите за надминување на ова прашање, соопштија од кабинетот на шефот на државата.
Претседателот Иванов ја поздравил конструктивноста и фокусираноста на мерките за градење на доверба меѓу двете држави и повикал на нивно проширување и внесување на нови содржини.
Македонскиот претседател порачува дека Република Македонија и натаму ќе учествува во процесот што се води под покровителство на Обединетите нации и истакнал дека е потребно да се создаде позитивен амбиент со цел подобро разбирање и почитување.
„Македонската страна со години наназад дава континуиран придонес и иницијативи во насока на градењето на доверба меѓу двете држави и двете општества. Неопходно е да се даде дополнителен импулс од двете страни во надминување на ова прашање, кое има суштинско значење за стабилноста и просперитетот на целиот регион”, истакнал претседателот Иванов на средбата со амбасадорот Нимиц.
Претседателот Иванов посочил дека во процесот кој се води во рамки на Обединетите нации, неопходно е стриктно придржување до рамката во која се водат разговорите, односно резолуциите на Советот за безбедност, Времената спогодба и пресудата од Меѓународниот суд на правдата во Хаг. Во таа насока, претседателот Иванов ја потенцирал потребата од почитување на меѓународното право и доследност кон меѓународно преземените обврски.
