Македонија

Иванов на итен состанок во Брисел по повод бегалската криза

Иванов на итен состанок во Брисел по повод бегалската криза

Претседателот Ѓорге Иванов ќе ја претставува Република Македонија на итниот состанок во недела во Брисел, кој го свика претседателот на Европската комисија Жан-Клод Јункер со сите шефови на држави и влади на земјите од Западен Балкан, а по повод бегалската криза, јави дописникот на МИА од Брисел.

Како што се наведува во соопштението лиферувано од неформалната влада на Европската унија, првите луѓе на балканските држави се повикани на координација за рутата на бегалците од Арапскиот свет и Африка.

Со оглед на вонредната состојба во земјите од Западен Балкан во однос на миграцискиот пат, постои потреба за поголема соработка, поширока консултација и непосредна оперативна акција. Затоа, по разговорите со неколку лидери, претседателот на Европската комисија Жан-Клод Јункер, организира лидерска средба на 25 октомври во Брисел, за да се разговара за приливот на бегалци по должината на рутата на Западен Балкан, се вели во соопштението на Комисијата.

Оваа средба, која ќе се одржи на ниво на шефови на држави или влади, ќе се одржи меѓу 16.00 и 19.00 часот во недела на 25 октомври 2015 во Брисел, проследено со работна вечера на седиштето на Европската комисија – „Берлемон“. Целта на средбата, според соопштението на Еврокомисијата, ќе биде да се договорат заеднички оперативни заклучоци кои може да се спроведат веднаш.

Според најавата, присутни на лидерската средба ќе бидат шефовите на државите или владите на Австрија, Бугарија, Хрватска, Република Македонија, Германија, Грција, Унгарија, Романија, Србија и Словенија. На оваа средба, исто така, ќе присуствуваат и претседателот на Европскиот совет Доналд Туск, претставник на Луксембуршкото претседателството со Советот на ЕУ и на Високиот комесаријат за бегалци на Обединетите нации. Исто така, поканети се и претставници на Европската канцеларија за поддршка на азил (ЕКПА) и Европската агенција за управување со оперативна соработка на надворешните граници на земјите-членки на Европската унија (Фронтекс).