Македонскиот премиер Ѓорге Иванов, оствари средба во неделата со претседателот на Европската комисија, Жан-Клод Јункер кој престојува во посета на Скопје, и притоа изразил благодарност за неговата поддршка за европската перспектива на земјата.
На средбата, како што соопштија од Кабинетот на преседателот, било разговарано за актуелната политичка состојба во Република Македонија, за процесот на евроатлантските интеграции, како и за клучните предизвици со кои се соочуваат регионот и Европската Унија.
Претседателот Иванов изразил благодарност за поддршката на Јункер за европската перспектива на Република Македонија, која претставува највисока стратешка надворешно-политичка цел, како и за неговата заложба за зајакнување на европскиот ангажман на Балканот како инвестиција во стабилна, силна и обединета Европа.
„Ја поздравуваме подготвеноста од Европската комисија за обновување на препораката врз основа на исполнетите критериуми од наша страна“, истакнал Иванов, дополнувајќи дека деблокирањето на интегративните процеси, преку соодветното вреднување на нашиот напредок, позитивно ќе влијае врз реформските процеси и врз целата општествено-политичка состојба во Република Македонија.
Македонскиот претседател во присуство на еврокомесарот за проширување Јоханес Хан ја нагласил неопходноста од фер и објективен пристап за Република Македонија, во однос на отпочнувањето на пристапните преговори за полноправно членство во ЕУ.
Во таа насока, претседателот Иванов позитивно ја оценил Стратегијата за Западен Балкан, промовирана од страна на Јункер и истакнал дека со документот којшто претставува јасна порака во кој се изразуваат очекувањата од кандидатите за членство во ЕУ, уште еднаш се потврдува европската иднина на регионот.
Во однос на добрососедските односи, претседателот Иванов ги реафирмирал македонските напори за унапредување на односите со сите соседи и за поголема регионалната соработка, со цел стабилен, безбеден и просперитетен регион. Во тој контекст, македонскиот претседател порачал дека изјавите на одредени политички лидери од регионот влијаат дестабилизирачки, не помагаат кон градење на добрососедски односи во регионот и не се европски.
