Претседателот на Република Македонија, Ѓорге Иванов од денеска престојува во работна посета на Република Словенија.
Претседателот во рамките на Брдо Бриони процесот, ќе учествува на „Самит 100 – Бизнис лидери во Југоисточна Европа“, кој ќе се одржи во Порторож.
Иванов ќе има обраќање на панелот на лидерите на тема „Нов договор за нова ера“, а ќе учествува и на состанокот на лидерите од Брдо Бриони Процесот со членовите на Бордот на директори на „Самит 100“.
Главната тема на дискусија на годинешниот самит е улогата на главните градови во регионот со цел инклузивен и одржлив развој, а во соработка со државните институции, бизнис заедниците и Европската комисија.
На „Самитот 100“ предвидено е учество на претседателот на Република Хрватска, Колинда Грабар-Китаровиќ, на претседателот на Република Косово, Атифете Јахјага, на претседателот на Црна Гора, Филип Вујановиќ, на претседавачот на Претседателството на Босна и Херцеговина Младен Иваниќ и на српскиот министер за економија Жељко Сертиќ.
Во рамки на посетата, предвидени се и билатерални средби на македонскиот претседател.
„Самитот 100“ се одржува по четврти пат и на него учествуваат бизнис лидери и истакнати претприемачи и стопанственици од Југоисточна Европа. Досега овој самит беше одржан во Република Србија во 2011 година, во Црна Гора во 2013 година и во Република Хрватска во 2014 година, а покровител на четвртиот самит во Порторож е претседателот на Република Словенија, Борут Пахор.
Доколку преземете содржина од оваа страница, во целост сте се согласиле со нејзините Услови за користење.