Изградбата на првата турска нуклеарка пролонгирана за три години

Првата турска нуклеарна централа најверојатно нема да биде пуштена во употреба пред 2022 година, иако првично беше планирано таа да стане оперативна најдоцна до 2019 година, соопштија високи официјални претставници во Анкара, пренесува МИА.

Пролонгирањето на изградбата на централата во јужниот турски град Акуј, според истите извори, се должи на доцнењето на стартот на реализацијата на проектот.

– Првиот реактор може да биде пуштен во погон најмалку седум години по почетокот на неговата изградба. Оттаму рокот до 2019 година, не може да биде исполнет, изјава неименуван висок претставник на турскиот енергетски сектор.

Турција пред неколку години покрена амбициоизна нуклеарна програма, чија цел е намалување на турската зависност од увоз на електрична енергија. Во 2013 година Анкара склучи договор вреден 20 милијарди долари со Руската државна корпорација за атомска енергија (Росатом), за изградба на нуклеарна централа со четири реактори со вкупна моќност од 1.200 мегавати.

Турција годишно за увоз на струја троши по околу 50 милијарди долари, а имајќи го предвид забрзаниот раст на потрошуивачката на електрична енергија, Владата во Анкара сака најдоцна за 10 години најмалку пет проценти од потребите на турските потрошувачи да ги задоволи од нуклеарни капацитети.

Турските медиуми наведуваат дека доцнењето на стартот на изградбата на нукеларката делумно е предизвикано и од проблемите во добивањето одобрение од службата за заштита на животната средина, која постави повисоки безбедносни стандарди по несреќата во јапонската нуклеарна централа во Фукушима во 2011 година.

Росатом на еколошкото одобрение мораше да чека речиси една годиниа и тоа конечно беше издадено лани во декември.

Експертите меѓутоа проценуваат дека реализацијата на проектот е загрозена и од финансиските проблеми со кои се соочува Росатом, предизвикани од западните санкции кон Русија поради кризата во Украина.

Доколку преземете содржина од оваа страница, во целост сте се согласиле со нејзините Услови за користење.