Македонија

Измените во Законот за здравствена заштита поддржани од матичната комисија

Измените во Законот за здравствена заштита поддржани од матичната комисија
Во Собранието денеска седници на четири собраниски комисии

Собраниската Комисија за здравство на денешната седница ги изгласа измените на Законот за здравствена заштита, во прво читање и ќе му предложи на Собранието да ја констатира потребата за негово донесување, пренесе МИА.

Министерот за здравство Никола Тодоров, образложувајќи го предлогот, истакна дека станува збор за обемен закон за којшто во изминатиот период се организирани серија јавни расправи и оти во него се вградени низа забелешки на еснафските здруженија.

– Со законот се регулираат повеќе аспекти на функционирањето во делот на здравството од евиденцијата на медицинската опрема, начинот на функционирање во рамки на на електронскиот систем „Мој термин“, организацијата на работа, Перфоманс менаџмент системот којшто го воведуваме како законски менаџмент систем во здравството врз онова на кој треба да работат и да бидат оценувани здравствените установи врз основа на кој директорите исто така ќе бидат оценувани. Нивната плата ќе зависи од успешноста односно неуспешноста на работата на здравствената установа, рече Тодоров.

Една од поголемите измени е онаа во делот на специјализациите, начинот на одвивањето на специјализациите и полагањето.

– Новиот систем треба да овозможи сериозно подигнување на квалитетот на знаење на специјалистите, докторите на медицина, имајќи предвид што предвидуваме задолжително осумчасовно работно време односно престој или дневна едукација на специјализантите. Исто така со законот се превидува и начинот на полагање на турнусите во текот на специјализацијата, истакна Тодоров.

По укажувањата за време на јавната расправа, како што посочи министерот, се предвидува намалување на цената на партиципацијата за приватните специјализации за делот којшто сега се уплаќаше на јавните здравствени установи.

Специјализацијата е така конципирана да биде поделена во два дела. Исто така се предвидува и давање времена лиценца за работа за постар специјализант и кои работи ќе може да ги извршува тој.

– Со законот се регулира и и начинот за обука на специјализантот во странство. Ние како Министерство се обврзавме да испраќаме определен број специјализанти во странство, како и продолжување на специјализацијата на товар на здравствената установа и регулирање на таканарелена работна специјализација односно овозможување еден специјализант и да работи во здравствена установа и да специјализира, ова особено е важно за оние кои имаат приватна специјализација, рече Тодоров.

Битни сегменти предвидени со измените, според министерот за здравство, се и централната евиденција на работното време, протоколот за безбедна хирургија којшто е во рамки на препораката на СЗО,  патеката за малигни заболувања, за дијабет, како и централниот систем за материјално и финансиско сметководство, којшто практично треба да ги поврзе сите здравствени установи во еден систем.

Пратениците ги поддржаа измените, но посочија и забелешки.

Мирсада Емини – Асани од ДУИ го поздрави донесувањето на измените, особено делот кој што се однесува на специјализациите. Добро е тоа што, вели Емини-Асани, специјализантите ќе имаат ментор и нема да бидат оставени сами да се снаоѓаат, како досега. Смета дека самата медицинска установа да го одредува времетраењето на прегледите и контролите, бидејќи 15 минути, на пример, не се доволни за одредени пациенти.

Пратеникот Андон Чибишев од ВМРО-ДПМНЕ вели дека добро е тоа што пациентите кои нема да дојдат на закажан термин, на некој начин ќе бидат казнувани, и тоа што пациентот ќе има право да се жали доколку лекарот не го прегледа. Исто така како и неговата колешка позитивно ги оцени измените во делот на специјализациите.