Денес, во рамките на својата работна посета на Република Турција, Министерот за транспорт и врски, Миле Јанакиески, оствари билатерална средба со Министерот за транспорт, поморство и комуникации на Република Турција, Лутфи Елван.
На средбата, министерот Јанакиески го информираше својот турски колега за тековните проекти кои се реализираат за подобрување на инфраструктурата во Република Македонија.
Договорена беше размена на 100 дополнителни транспортни дозволи за 2014 година кои македонските превозници ќе можат да ги користат.
Во рамките на посетата на Турција, министерот за транспорт и врски Миле Јанакиески оствари средба со компании од “Бизнис асоцијацијата на млади бизнисмени ТУГИАД”, од Турција, заинтересирани за инвестиции во Република Македонија. Се работи за компании од градежниот сектор, хотелиерството, енергетиката и рударството, автомобилската индустрија и железничкиот сектор.
Министерот Јанакиески пред присутните компании ги претстави инфраструктурните проекти во делот на патната и железничката инфраструктура, гасификацијата и туризмот што се реализираат во Република Македонија како и најавите за нови инвестиции во инфраструктурата.