Македонија

Јолевски се обрати пред студентите на Колеџот во Јужна Флорида

Јолевски се обрати пред студентите на Колеџот во Јужна Флорида

Безбедноста на секој граѓанин, на секој човек треба да биде наша цел и обврска. Но, за да ја достигнеме таа цел, потребни се кадри кои имаат високо ниво на познавања, исклучителни способности и капацитети, како и висока мотивираност, истакнал министерот за одбрана на Република Македонија Зоран Јолевски, во своето обраќање пред студентите, кадетите и водството на Колеџот на Јужна Флорида, САД, пренесе МИА.

Регионалната поврзаност, соработката и интероперабилноста, нагласи тој, се клучни за да можеме да ја развиваме нашата Армија, но и армиите на земјите во регионот и пошироко, соопшти денеска МО. Јолевски посочил дека денес заканите не запираат онаму каде што се и границите, туку нивните влијанија и потенцијалните ризици се транснационални и затоа, според него, меѓусебното поврзување и колективниот развој се базата за безбедноста на Република Македонија, регионот, Европа, па и светот.

Во тој контекст, додал Јолевски, Македонија сериозно му пристапува на ова прашање и веќе 13 години е дел од меѓународните мировни мисии, меѓу кои и во Авганистан, првично во мисијата ИСАФ, и денес во мисијата „Одлучна поддршка“.

– Пример за посветеноста на Македонија кон мирот и безбедноста е и нејзината стратегиска цел – членството во НАТО-Алијансата и во Европската Унија. Македонија и АРМ се подготвени да го заземат заслуженото место како полноправен член на Северноатлантската алијанса,истакнал министерот Јолевски.

Во обраќањето, Јолевски се осврнал и на реформските зафати и развојот на Воената академија во Република Македонија, која е една од најпрестижните институции, каде што освен кадети за потребите на АРМ се школуваат и кадети за потребите на вооружените сили на Босна и Херцеговина, Црна Гора и Косово. Во однос на академијата, министерот за одбрана информирал дека со најновите промени, дел од курсевите во трета и четврта година ќе се реализираат на англиски јазик, со што ќе се отвори и можноста за размена на студенти и кадети со другите странски високообразовни институции.

Инаку, Колеџот на Јужна Флорида е приватна образовна установа основана во 1883 година. Колеџот е рангиран на петтото место на ранг-листата за најдобри регионални колеџи за 2015 година.