14.8 C
Skopje
петок, март 29, 2024

Јовановиќ: И физичките лица ќе треба да плаќаат ДДВ

Физичките лица кои остваруваат промет повисок од еден милион денари мора да плаќаат ДДВ и за тоа не треба да има никакви дискусии или дилеми, вели советникот во Министерството за финансии, Бранимир Јовановиќ. Додека во стручната јавност има низа дилеми околу тоа кои категории граѓани треба да бидат ДДВ обврзници, Јовановиќ е категоричен: „Обврзник е секое лице кое врши самостојна стопанска дејност.“

И тука нема никаква промена направена во изминатиов период. Ова е од секогаш, од самото донесување на законот за ДДВ односно од 1999 година. Прашањето што се поставува е зошто ова порано не се спроведувало?“, вели Јовановиќ за Алсат.

Сепак, законот за ДДВ не прецизира што се подразбира под терминот „стопанска дејност“. УЈП првпат минатата година побара од физичките лица да се регистрираат како ДДВ обврзници, но по реакциите во јавноста немаше казни за оние кои не ја испочитувале обврската. Поради тоа, таа не се спроведе во пракса.

Истото УЈО го повтори и годинава, но само со објавување повик на својата интернет страница и тоа на 11-ти јануари, само четири дена пред истекот на законскиот рок за регистрација. Оттаму сега нема информација колку физички лица се регистрирале и дали ќе има казни за оние кои не го направиле тоа. Според Јовановиќ, целта не е да се приберат повеќе пари во буџетот.

Еден милион денари на годишно ниво се околу 16.000 евра што на месечно ниво се околу 1.400 евра. 1.400 евра отприлика заработуваат најбогатите еден процент од луѓето така што со оваа обврска да се плаќа ДДВ на прометот што надминува еден милион денари практично не се даночат сиромашните или најголем дел од луѓето, се даночат најбогатите еден процент од луѓето“, додава Јовановиќ.

Во брошурата на УЈП стои дека како ДДВ обврзници треба да се регистрираат оние лица кои заработуваат како вештаци, стечајни управници, потоа врз основа на наемнини, авторски договори, договори на дело, членување во надзорни одбори, земјоделска дејност. И тие, како и фирмите имаат право на поврат на ДДВ. Сепак, останува главната забелешка на стручната јавност дека сето ова се прави без соодветна кампања за информирање на граѓаните што остава многу отворени прашања.

Доколку преземете содржина од оваа страница, во целост сте се согласиле со нејзините Услови за користење.