Македонија

Како да се заштитите од жолтица

Како да се заштитите од жолтица

Министерството за здравство заради појавата на заразна жолтица на подрачјето на град Скопје и во Штип, со цел спречување на појава на нови случаи, посочи со мерки за превенција за заштита од жолтица.

Оттаму укажуваат дека начинот на пренос на ова заболување може да се спречи со редовно одржување на личната и општата хигиена.

Заразната жолтица е заболување коешто се пренесува по фекално-орален пат, односно вирусот од болно лице се исфрла преку фецес, најчесто со нечисти раце при внесување храна или вода. Вообичаените контакти меѓу луѓето не придонесуваат за ширење на болеста.

За таа цел, од Министерството,  потсетуваат на потребата од почитување на основните мерки за превенција од вирусниот хепатит А.

Препорачани санитарно-хигиенски и противепидемиски мерки:

– Редовно одржување на личната и општа хигиена

– Од особена важност е темелно миење на рацете задолжително пред секое јадење и по секое одење во тоалет.

-Миењето на раце треба да биде со течен сапун или со сопствен сапун

– Бришење на раце со бришач за еднократна употреба или со сопствена крпа за бришење

– Потребно е темелно миење на овошјето и зеленчукот пред конзумација

– Конзумирање безбедна вода за пиење (од водоводни мрежи), како и избегнување пиење вода од непроверени чешми, локални иззвори, бунари и сл.

– Соодветно третирање и отстранување на отпадот

– Одржување на хигиена во домот и санитарните јазли, како и одржување на хигиената во колективни објекти каде престојуваат ученици, мали деца и постари лица (училишта, детски градинки, домови за згрижување стари лица).