Владата на Социјалдемократскиот сојуз не е реформска, туку антиреформска, тоа се потврдува и со предложените измени на законот за култура кои се доставени по скратена постапка до Собранието на Република Македонија, каде што наместо унапредување и валоризирање на трудот на уметниците, се предлагаат измени во насока на девалвирање на уметничкиот придонес на личности кои што оставиле значителен влог за македонската култура, истакна поранешната министерка за култура Елизабета Канческа Милевска од ВМРО-ДПМНЕ.
„Социјалдемократскиот сојуз и министерот Алаѓозовски по најавата дека ќе ја укинат титулата Национален уметник, сега удираат и врз културните дејци со особени достигнувања за културата на Република Македонија и им ја намалуваат националната пензија. Тоа е голема неправда кон уметниците во Македонија. Владата на ВМРО-ДПМНЕ валоризирајќи го трудот на уметниците и културните дејци кои целото свое животно дело го посветиле за афирмација на нашата култура и држава и во домашни рамки и во светот, во 2012 година со измена на законот за култура овозможи сите уметници кои се добитници на врвните државни награди за култура, да остваруваат право на паричен надоместок во висина од разликата меѓу пензијата што ја остваруваат и највисоката пензија во Република Македонија во претходната година, за тековната година“, рече Канческа Милевска .
Тоа значи, додаде, дека владата на ВМРО-ДПМНЕ веќе пет години им го даваше ова право на уметничките дејци, а сега Социјалдемократскиот сојуз го уназадува и намалува.
„Социјалдемократскиот сојуз без срам предвидуваат измена во законот со кој на овие репрезенти и бардови на македонското културно творештво им ги намалуваат средствата за национална пензија, достојна за трудот кој го вложиле за својата сопствена држава. Социјалдемократскиот сојуз предвидува горната граница од која ќе се пресметува надоместокот наместо да биде врзано за растењето на највисоката пензија која за 2016-та година е 47.873 денари, да биде фиксирана на 38.500 денари. Ова е директен удар врз луѓето и нивната егзистенција кои својот живот и дело го посветиле на македонската култура и нејзината афирмација. Социјалдемократскиот сојуз со ова ја покажува целата своја негрижа и безчувствителност за уметниците во културата, рече Канческа Милевска и додаде:
„Со оваа законско решение на ВМРО-ДПМНЕ беа опфатени 66 лица кои својот живот и дело го врежале во македонското културно творештво, помеѓу имињата на долгата листа значи од таа на 66 личности кои дале особен придонес за македонската култура и се приматели на овие средства јас ќе спомнам значи дел од нив бидејќи е долга листата нели од 66, а тоа се: Александар Џамбазов, Милица Стојанова, Мето Јовановски, Себахат Ајрула Тозија, Ефтим Клетников, Милка Ефтимова, Газанфер Бајрам, Коста Балабанов, Реаул Шабани, Раде Силјан, Ивица Зориќ, Родољуб Анастасов, Цветан Грозданов, Лилјана Мазова, Катица Ќулавкова, Бајруш Мјаку и многу други. Сите тие сега ќе се соочат со безчувствителноста на Социјалдемократскиот сојуз“.
Социјалдемократскиот сојуз и Алаѓозоски со ваквата своја одлука, според Канческа Милевска, се изживуваат со животите на културните работници, кои својот живот и дело го посветиле на културата во Република Македонија и нејзиниот развој.
„Сакам да информирам дека пратениците на ВМРО-ДПМНЕ поднесоа амандман со кој се бара да се задржи претходното законско решение кое стапи во сила од 1 јануари 2012 година за сите уметници и стручни работници од областа на заштитата на културното наследство како добитници на наведените државни награди во законот да продолжат да го остваруваат правото на месечен паричен надоместок во висина од разликата меѓу пензијата која ја остваруваат, значи ја добиваат и највисоката пензија во Република Македонија во претходната година, за тековната година. Апелираме до пратениците на Социјалдемократскиот сојуз и до министерот Алаѓозовски да го поддржат нашиот амандман, поточно да остане во сила постојното законско решение, за да се продолжи да се унапредува и валоризира трудот на уметниците и стручните работници кои што оставиле траен влог во културата и идентитетот на Република Македонија, а не да се уназадува и да се девалвира нивниот лик и дело“, зарши Канческа Милевска.
