Македонија

Конкурс за најдобра фото сторија за животната средина

Конкурс за најдобра фото сторија за животната средина

Од денеска почнува конкурсот на тема „Еко совест на општеството“ што го објавува невладината организација „4х4х4 Балкански мостови“ во соработка со „Пакомак“ и „Нула отпад“.

Конкурсот ќе трае до 1 септември и на него ќе може да се пријават сите новинари и фоторепортери од печатените и електронските медиуми кои ќе достават оргинално објавен новинарски текст со фотографии во кој се актуелизира граѓанското и институционалното невнимание кон животната средина.

Пријавените фото стории ќе бидат оценети од стручна жири комисија составена од претставници на организаторите, Министерството за животна средина и просторно планирање, од медиумите и од невладините организации.

Добитниците ќе бидат објавени на 19 септември кога почнува Светската еколошка кампања „Да го исчистиме светот“. За првото место предвидена е награда од 25 илјади денари, за второто 15 илјади и 10 илјади денари за третото место. За медиумот кој ќе биде избран дека дал значителен придонес во информирањето на јавноста за темите од екологијата и човековата околина, ќе биде обезбедена опрема за сепарирање на отпад што ќе ја донираат „Пакомак“ и „Нула отпад“.

На 19 септември, кога ќе бидат прогласени победниците, планирано е да биде отворена и изложба на сите пријавени стории и фотографии. Изложбата ќе има патувачки карактер и низ повеќе градови во државата.