Консолидираната ВМРО-ДПМНЕ го зголемува рејтингот, се очекува трендот да продолжи

977

Вистинското расположение за Договорот со Грција и скандалите на власта ќе се покажат на следните анкети, а зголемениот рејтинг на ВМРО-ДПМНЕ кај гласачите, во прв ред, е резултат на активизмот на партијата и консолидирањето на партијата, и оттаму може да се очекува продолжување на трендот на раст на довербата во најголемата опозициска партија.

За релативно кус период, ВМРО-ДПМНЕ направи значително подобрување на рејтингот кај избирачите, имајќи предвид особено откако по речиси една деценија партијата замина во опозиција. Покрај тоа, партијата доби и ново раководство, што со себе вообичаено ги носи предизвиците на пројави на незадоволници и фракционерство и поделби во партиското ткиво. Сепак, се чини, дека новиот лидер Христијан Мицкоски успеа да им одолее на сите вакви појави на внатрешни поделби, фракционерство и подметнувања.

Подемот, или скокот за 3,4 отсто на довербата на граѓаните во ВМРО-ДПМНЕ, наспроти падот на рејтингот на владејачката СДСМ за над цел процентен поен, може така да се каже, започна со лидерскиот дуел, во кој неподелена е оцената дека Мицкоски наспроти премиерот и лидер на социјалдемократите Зоран Заев се претстави како личност со јасен концепт, концизност и, што е многу поважно, без темни петна. Потоа, како што забележаа и повеќето аналитичари во своите коментари на резултатите од испитувањето на јавното мнение спроведено од институтот МЦМС во последната седмица од јули, неоспорно е дека за растот на рејтингот на најголемата опозициска партија придонесе постојаното присуство во јавноста и особено на теренот меѓу граѓаните. По успешниот скопски митинг од почетокот на јуни, ВМРО-ДПМНЕ започна со засилен активизам, и речиси секојдневни собири во градовите низ државата, во рамките на акцијата Лето за Македонија, при што директно се посетуваат граѓаните и со нив се остварува непосреден контакт.

Забележливо, исто така произлезено од резултатите на анкетата, е дека постои голем простор за продолжување на трендот на раст на ВМРО-ДПМНЕ. Имено, покрај речиси 38-те отсто неодлучени испитаници во истражувањето, треба да се истакне и фактот дека тоа е спроведено во периодот пред во јавноста силно да одекнат тендерските и скандалите со злоупотреби на владејачките структури, кои допрва ќе имаат својот одек и рефлексија врз довербата на испитаниците во партиите и политичарите.

Освен тоа, се очекува дека во следните месеци големо влијание во анкетите ќе има и Договорот со Грција, како што ќе се приближува датумот за одржување на референдумот за промена на уставното име на Република Македонија, како круцијална одредба од споменатиот договор. И тоа поради фактот што мнозинството од граѓаните, односно меѓу 50 и 60 отсто се незадоволни од договорот со Грција, односно само 28 проценти од етничките Македонци го поддржуваат договорот.

Сега на потег се партиите. ВМРО-ДПМНЕ, ќе мора да останат имуни на чувството на самозадоволство од споменатите резултати и уште позасилено да бидат присутни во јавноста со конструктивност. Во владејачката СДСМ, пак, мора навистина сериозно да се размислат дали досегашната тактика на споредување со наводни дубиози на претходниците им е навистина од полза. Граѓаните јасно порачуваат дека тој период е завршен, оти сега очекуваат резултати. Покрај тоа, владејачите ќе мора да ги напуштат и досегашните практики на сервирање во јавноста конструкции. Едноставно, тоа очигледно кај избирачите „не врви“.

Skin Delight

Доколку преземете содржина од оваа страница, во целост сте се согласиле со нејзините Услови за користење.