Балкан

Сојузниците ја советуваа Приштина Косово ги повлекува барањата за членство во УНЕСКО и Интерпол

Косово ги повлекува барањата за членство во УНЕСКО и Интерпол

Косовските власти во средата дона вечерта соопштија дека се откажале од барањето за членство во меѓунродните организации УНЕСКО и во Интерпол, што наидуваше на голем отпор од Белград.

Косовското Министерство за надворешни работи соопшти дека „прагматичното одложување“ на барањето на Приштина за членство во Интерпол и во УНЕСКО е засновано врз целосна и блиска соработка со САД, Британија, Франција, Германија и Италија.

„Министерството за надворешни работи оценува дека тие акции придонесуваат за зајакнување на меѓународната положба на Косово, натамошно унапредување на односите со партнерските и сојузничките земји, гарантирање безбедност и унапредување на мирот во регионот“, се наведува во соопштението.

Од друга страна, во документот околу процесот за поднесување барање од страна на Косово за прием во меѓународните организации, се додава дека процесот за стекнување членство на Косово во регионалните, континенталните и светските организации, односно Обединетите нации и агенциите поврзани со нив, и натаму останува приоритетна цел на Приштина.

„Косово досега се придружи на повеќе од шеесет регионални, континентални и глобални организации и секоја акција на поднесување барање, процедура или процес за добивање членство, се презема во целосна и блиска координација со стратешките и историските сојузници на Косово, односно САД и ЕУ“, се истакнува во соопштението.

Косовската дипломатија нагласува дека заедно со Владата дејствува на координиран и одговорен начин, штитејќи го „националниот интерес“ на Косово.

„Какви било други тврдења со цел да се создаде негативна слика во јавноста се неразумни и непрофесионални“, се заклучува во соопштението на  Приштина.