Четири лица меѓу кои лидерот на СДСМ Зоран Заев се осомничени во големата полициска акција „Пуч“, јави МВР.
Според информациите што денеска беа соопштени од страна на МВР, прв осомничен е поранешниот директор на ДБК, Зоран Верушевски кого полицијата го терети за шпионажа и помагање на насилство врз државни функционери. Покрај него осомничен е и лидерот на СДСМ Зоран Заев кој од септември остварувал средби со Груевски и му се заканувал со наводни докази против него, барајќи техничка влада и избори. За возврат Заев велел дека нема да ги објавува т.н. бомби. Според полицијата изворот му бил Верушевски.
Применети се посебни истражни мерки а на 22 јануари извршен е и претрес кај Верушевски при што се најдени 2 пиштоли, 4 компјутери и 6 мобилни. Од анализата на содржината во компјутерите пронајдени се илјадници документи кои покажуваат дека се сторени делата.Меѓу доказите најдени се и снимки од разговори на лица од политиката и јавниот живот. Станува збор за обемна содржина од преку милион фајлови.
Покрај ова, одземен е и компјутер од Стопанска банка каде работела сопругата на Верушевски.
Покрај Верушевски и Заев осомничен е и вработен во општина Струмица. Денеска извршен е и претрес на неовото работно место при што се одземени 4 компјутери, а претресот се уште е во тек.
Како што соопшти МВР, целата група ќе одговара за насилство кон државни органи, загрозување на уставени поредок и демократски институции, дело кое прв пат се открива во Македонија.
Инаку, лидерот на СДСМ, Заев е единствениот кој не е приведен во оваа полициска акција. Останатите тројца веќе се во рацете на полицијата.