Спорт

Криза во Металург, Атман потпиша за Веспрем

Криза во Металург, Атман потпиша за Веспрем

Средниот бек на Металург, Павел Атман од следната сезона ќе биде член на унгарски Веспрем, бидејќи пред неколку дена потпиша договор со актуелниот учесник на Ф4 турнирот, и најдобриот тим во Унгарија. Важноста на договорот е за од следната 2015/2016 сезона.

Иако клубот од Унгарија го нема потврдено трансферот, во таборот на Металург, и сите играчи се запознаени со одлуката на Атман да си замине од Македонија и кариерата да ја продолжи на друго место. Тоа што уште отсега Атман потпишал за друг клуб значи дека воопшто не размислувал да почека понуда од клубот за евентуално останување и следните сезони во Автокоманда.

Уште летово повеќе клубови беа заинтересирани за услугите на рускиот репрезентативец, екипи од Европа, но и од Катар, но тој имаше двегодишен договор со скопјани, па по завршувањето на оваа сезона ќе си замине како слободен играч

Атман дојде во Скопје лани во јуни од екипата на Динамо Минск, и беше еден од најдобрите играчи во клубот, и на многу натпревари беше играчот што го „решаваше противникот“. Во тандем со Ренато Вугринец и Филип Миркуловски го понесоа најголемиот товар ланската сезона во која Металург стигна до четвртфиналето на ЛШ и го освои првенството.

Атман постигна 47 гола во Лигата на шампионите, а кога потпишуваше за Металург изјави дека не било решавачки финансиската понуда тука тоа што ќе биде дел од тим предводен од Лино Червар.