Кризата од еболата може да трае уште една година

Кризата со еболата во Западна Африка најверојатно ќе трае уште цела една година, тврди водечкиот експерт-епидемиолог Питер Пиот, кој е заслужен за откриваање на овој смртоносен вирус.

Пиот, кој до неодамна престојуваше во Сиера Леоне, во Лондон изјави дека е охрабрен од напредокот што таму е постигнат, како и од ветувањата за новата антивирална терапија.

Тој сепак предупредува дека не треба да се заговара преголем оптимизам, затоа што ќе треба време за да се развие и унапреди вакцината.

Епидемијата на еболата, досега предизвика смрт на 7.300 лица во реонот на Западна Африка, што е најсмртоносна епидемија од овој вирус откако тој е откриен пред речиси 40 години. Најголемиот број од жртвите се во три држви од овој дел на Африка – Сиера Леоне, Либерија и Гвинеја.

Професорот Пиот, кој е еден од научниците кои го открија вирусот ебола во 1976 година, сега е директор на лондонската Школа за хигиена и тропска медицина.

Според неговото толкување, иако епидемијата веќе достигна врв во Либерија, а во наредните неколку недели тоа ќе се случи и во Сиера Леоне, таа може да продолжи да зема уште жртви и во Западна Африка да трае се до крајот на 2015 година.

Пиот смета дека здравствените власти треба и натаму да останат подготвени за долга борба со вирусот, која тој верува дека ќе се оддолжи уште цела една година.

Доколку преземете содржина од оваа страница, во целост сте се согласиле со нејзините Услови за користење.