Круз и Кејсик се здружија со цел да го поразат Трамп

Тед Круз и Џон Кејсик, ривали на фаворитот за номинација на Републиканската партија за кандидат на претседателските избори во САД, Доналд Трамп презедоа невообичаен чекор и објавија план за координација на своите стратегии на внатрепартиските избори во преостанатите сојузни држави, со цел на Трамп да му ги одземат делегатите, потребни за директна номинација на партијата.

Круз и Кејсик речиси истовремено објавија соопштенија, во кои се наведува дека постигнале спогодба без преседан во американската политика.

Со договорот е предвидено кампањата на Кејсик да му даде „отворен пат“ на Круз во Индијана, додека во замена кампањата на Круз ќе му го „отвори патот“ на Кејсик во Орегон и Ново Мексико.

– Именувањето на Доналд Трамп за кандидат на Републиканската партија на претседателските избори во ноември би било сигурна катастрофа за републиканците, нагласи во соопштението менаџерот на кампањата на Круз.

– Не само што на претседателските избори демократите Хилари Клинтон или Барни Сандерс ќе го „избришат подот“ со Трамп, туку и самата негова номинација ќе ја уназади нашата партија за цела една генерација, рече тој.

Соопштението на двајцата ривали на Трамп е објавено само 48 часа пред почетокот на внатрепартиските избори во североисточниот дел на САД, каде се очекува дека контроверзниот милијардер ќе го зголеми бројот на делегатите кои го поддржуваат.

Доколку преземете содржина од оваа страница, во целост сте се согласиле со нејзините Услови за користење.