По информациите дека утрото меѓу 10.30 до 10.50 часот грчки воен авион навлегол во Република Македонија, од Македонска навигација (М-НАВ) за МИА информираат дека досега кај нив нема регистрирано нарушување на македонскиот воздушен простор.
Од АРМ претходно за МИА појаснија дека во близина на македонско-грчката граница визуелно се забележани грчки воздухоплови кои надлетувале над Идомени, но врз основа на визуелно набљудување не може да се потврди дали и колку еден од авионите навлегол без прецизни мерења од надлежните институции.
Како што јави дописникот на МИА од Гевгелија, неколку грчки авиони и четири хеликоптери во наведениот период во три наврати надлетувале над границата во делот на кампот во Идомени со цел да извршат притисок врз бегалците, во рамки на нивната воена вежба наречена „Бура“.
Вежбата, според грчките медиуми, била најавена како подготовка за распоредување војници за заштита на македонско-грчката граница кои би биле логистика за рачистување на кампот во Идомени и дислоцирање на бегалците во прифатни центри во внатрешноста на Грција.
Граѓаните на Гевгелија и многуте грчки граѓани кои дојдоа денеска на пазар во Гевгелија беа видно вознемирени и исплашени од надлетувањето на грчките авиони.