Македонија и Грција ги размениле нацрт договорите

Министерството за надворешни работи на Република Македонија денеска го достави до грчката страна Нацрт-договорот што беше интензивно подготвуван во последниве денови, а пред неколку дена стигнал и грчкиот Нацрт-договор, изјави министерот за надворешни работи, Никола Димитров.

Според него, постојат  разлики, но ако се мисли на една цел, ќе успеат да се надминат тие разлики.

-Со ова, комуникација која што досега се одвиваше главно низ усмен дијалог влегува во една фаза, каде што има и размена на пишани документи. Убедени сме, целта е да се најде едно одржливо и едно достоинствено решение за надминување на разликата околу името. Да се најде една разумна дистинкција меѓу нашата држава Македонија и регионот Македонија во Грција. Тоа е можно. Со нетрпение и со задоволство ја очекуваме посетата на мојот колега министерот Коѕијас којшто ќе допатува во четврток. Ќе има доста средби и активна програма во петок- рече Димитров.

Според него, двајцата министри ќе ги продолжат разговорите во Виена на 30 март, под медијаторство на господинот Нимиц, под покровителство на ОН.

-Убедени сме, дека елементите, од нашата Нацрт-спогодба ќе бидат корисни и во рамките на тој процес, којшто е главен, бидејќи и формално врз основа на Резолуцијата 817, од 1993 година, на Советот за безбедност на ОН, овој процес и се води токму за тоа. Да се надмине разликата околу името и процесот се води под покровителство на Светската организација, на ОН- рече министерот.

Доколку преземете содржина од оваа страница, во целост сте се согласиле со нејзините Услови за користење.