Македонскиот премиер, Никола Груевски денеска во Владата оствари средба со својот турски колега, Ахмет Давотоглу.
Премиерот Груевски истакна дека билатералната средба се покажала како многу продуктивна и на неа се договорила соработка на сите полиња.
-Република Турција е долгогодишен наш пријател, кој секогаш е наша поддршка во нашите евро-атлански аспирации, како и земја која дава вредносна поддршка на нашите национални интереси. Турција е земја која во последниве години ја вбројуваме во топ 10 земји со кои имаме трговска размена и инвестиции, рече Груевски.
Тој додаде дека на средбата се разговарало и за унапредување на туризмот на двете држави.
-Туризмот ќе се развива во двете насоки, како во организирани посети, така и во инвестиции. Напредок и подобрување на соработката е остварен во повеќе полиња како земјоделството, продлабочување на бизнис соработката на трговски и економски план. Соработката ја подобруваме и на културен план, наскоро ќе се отворат и културни центри во двете држави. Владата воведе и стипендии за преведување и толкување од старотурски јазик што покажува дека работиме на постигнување на заедничките цели, рече премиерот Груевски.
Турскиот премиер Давутоглу исто така е согласен дека соработката која двете држави ја имаат во моментов е на солидно ниво и истата треба да се продлабочи.