Македонија

Македонија на Саем за храна во Торино

Македонија на Саем за храна во Торино

Валандовско слатко од диви смокви, сирење од мавровско-реканскиот регион, рчели (тиква варена во маџун) од Тиквешијата, собра грав од Струмичко, колешински кикиритки и буковска пипер од Малешевијата, се производите што Македонија ќе ги промовира на 9. меѓународен саем за традиционална храна „Салон дел густо“ и 5. конференција „Тера Мадре“ во Торино, пренесува МИА.

Во фокусот на двете манифестации кои се одржуваат истовремено, од денеска до 27-ми октомври, е семејното земјоделство. Како што јави известувачот на МИА, се очекува учество на преку 900 изложувачи од целиот свет меѓу кои и сточари од Кенија и Сибир, одгледувачи на овошје од Калифорнија и Перу, рибари од Холандија и Кореа,…

Според програмата, ќе се одржат повеќе од 80 работилници, дебати, презентации, обуки, предавања за вкусовите, за разликите меѓу природната, бавно подготвена и брзата храна.

Посебен дел е посветен на т.н. Арка на вкусови каде што се раскажуваат индивидуални приказни за потеклото, начинот, квалитетот и за приготвувањето на прехранбените производи, нивното влијание врз културата, историјата, обичаите, навиките, менталитетот.

Посетителите ќе може да дегустираат и разни пијалаци, специфични за поднебјето од каде што доаѓаат изложувачите, предвидена е посебна Соба за пиво, која ќе нуди белгиски, шпански, британски, германски, скандинавски и новозеландски пива, претставени ќе бидат и Слоу фуд вредностите во светот на брзата храна и Глобалното движење за едукација за храна, Миланскиот протокол: Политика за храна 2015, а најавена е и проекција на наградениот документарен филм за семејно фармерство „По зимата, пролет“.

Термин е одвоен и за т.н. Конференција за Балканот во чии рамки ќе се промовираат и дегустираат производи од осум земји од регионот.

Како што соопшти организаторот – интернационалната мрежа „Слоу фуд“, на две конференции – за нужните промени и вклучувањето на младите во системот на исхрана, ќе присуствува и познатиот ТВ готвач и активист за храна Џејми Оливер.

Новина на Саемот е школата за готвење на која директно ќе се приготвуваат и дегустираат јадења од разни земји и култури.

„Салон дел густо“ и „Тера Мадре“ ќе ги проследат новинарски екипи од целиот свет меѓу кои и „Радио 4“ на Би-Би-Си, повеќекратно наградувано за т.н. Food programme. Радиото посебно ќе се задржи на манифестацијата „Арка на вкусови“ која ќе се одржува на простор од 600 метри квадратни специјално осмислен и напрвен во форма на Арката на Ное. Сите разговори што ќе се снимаат со фармерите и други производители, ќе бидат емитувани во текот на 2015 година.

Зад учеството на македонската делегација на „Салон дел густо – Тера Мадре“ стои „Слоу фуд -Македонија“, која го поттикнува одржливото земјоделство и работи на заштита на вкусовите и на биодиврезитетот. Дел е од интернационална мрежа „Слоу фуд“ која има претставништва во 150 земји.

– За нас ќе биде особено интересна конференцијата „Направено во Италија, но не од Италијанци“ која ќе се одржи претпоселдниот ден, а тема се странските работници и емигрантите во Италија, меѓу кои и над 100.000 Македонци кои во потрага по заработувачка заминуваат на сезонска работа во регионот Пиемонте, вели Николче Николовски од „Слоу фуд Македонија“.

„Слоу фуд“ е основана во 1980 година од Италијанецот Карло Петрини и група активисти со цел заштита на традиционалните прехранбени производи и враќање кон бавниот, наспроти денешниот брз начин на исхрана.

Македонската делегација на годинашните „Салон дел густо“ и „Тера Мадре“ ја сочинуваат 30-ина членови, најголем дел фармери, традиционални производители и претставници на науката.