Сведоци сме на почетокот на медиумскиот мрак кој на дело го спроведува новата севернокорејска влада на Република Македонија предводена од СДСМ, којашто не е реформска како што се прикажува, туку е цензорска, изјави во саботата Коче Гаврилов, член на Извршниот комитет на Унијата на млади сили на ВМРО-ДПМНЕ.
„Имено вчера неколку македонски медиуми објавија дека раководни лица во Владата селективно забраниле пристап на компјутерите на вработените до порталите Курир, Инфомакс, Јавно, ТВ Нова и уште десетина други. Зоран Заев мисли дека ако се читаат само Плусинфо, Либертас, А1ОН и останатите портали финансирани од СДС/Сорос тогаш ќе ги сокрие криминалите и деструктивните политики, а јавноста нема да знае за одбивањето да се укине радиодифузна такса, да се продолжи породилното или да се сработи било што од корист за граѓаните“, истакна Гаврилов.
Според него, скандалозно е само посебе цензурирањето коешто на дело се спроведува.
„Денес тоа е забрана во Владата на Република Македонија, утре тоа може да се однесува на сите државни институции, а на крај може да заврши со целосна забрана за нивно работење. Сѐ уште се свежи сеќавањата за директните закани кои ги добиваа новинари од овие медиуми, на кои им праќаа пораки дека ќе ги влечат по улици, на кои им кршеа простории и на кои директно вербално, па дури и физички им се закануваа. Оваа севернокорејска матрица на работење на СДС и новата влада покажува дека тие само лицемерно зборуваа за демократија и отвореност кон критики, а всушност подготвени се на целосна ликвидација на медиумите кои известуваат за нивната работа објективно“, рече претставникот на подмладокот на ВМРО-ДПМНЕ.
Гаврилов додаде дека медиумите не се и не смеат да бидат третирани како политички непријатели, а уште помалку да се ограничува нивното работење и пристапот на информации.
„Ова отвора сомнеж дали владата на Заев во пресрет на своите антидржавни потези кои планира да ги спроведе има намера да ги замолчи медиумите кои не се согласуваат со нивната деструктивна политика. ВМРО-ДПМНЕ бара сите новинарски и медиумски здруженија да ја осудат ваквата постапка на владата. Овој тоталитарен потег е спротивен на сите демократски и европски вредности“, заклучи Гаврилов.
