Македонија

Македонскиот туризам расте најбрзо на Балканот

Македонскиот туризам расте најбрзо на Балканот

Сите што имаат излез на море сѐ уште се неспоредливо попосетени од другите, но фактот што најголемиот раст е забележан во Македонија, Србија и во Босна и Херцеговина укажува дека се зголемува интересот и за други видови туризам во регионот, пишува Нова Македонија.

ИЗВЕШТАЈ НА ОБЕДИНЕТИТЕ НАЦИИ

Охрид е празен и е жртва на негативна кампања, па потоа Охрид е преполн со туристи од многу земји. Скопје постојано ги урива своите рекорди по посетеност. Преспа се враќа на голема врата со по десетина илјади гости преку викендите, а Дојран е хит подолго време. И првите луѓе на државата ѝ се посветија на оваа тема. Премиерот Никола Груевски, по неодамнешната средба со претседателот на Светската туристичка организација Талеб Рифаи, изјави дека туризмот во Македонија има голем потенцијал за раст и дека Владата посветува посебно внимание на оваа гранка. Тој наведе дека освен што е формиран Комитет за туризам, како посебно владино тело, намалена е и стапката на ДДВ за туристички услуги, се субвенционираат тури со странски гости, се развива концептот на туристички развојни зони итн.
Вицепремиерот Владимир Пешевски, пак, потенцираше дека според владините пресметки, бројот на посетители на земјава се зголемил двојно од 2006 година досега, а тоа меѓу другото се должело и на субвенциите што им се давале на нискобуџетните авиокомпании. Меѓу другите информации поврзани со туризмот, особено внимание предизвика предлогот на Лела Крстевска, претседателката на Стопанската комора за туризам, според која К-15 треба да се дава како ваучер за одмор во Македонија и со тоа да се поттикне домашниот туризам.

ГОЛЕМ ПРОЦЕНТУАЛЕН РАСТ, МАЛКУ ТУРИСТИ

По толку активности поврзани со туризмот, каде се наоѓа Македонија во најновиот извештај на Светската туристичка организација на Обединетите нации (УНВТО) и колку е посетена во споредба со другите земји? Податоците на ОН покажуваат дека таа има најголем раст на посетеноста во целиот балкански регион. Бројот на странци што влегле во Македонија, според извештајот, се зголемил од 262.000 во 2010 година на проценети 400.000, што значи дека пораснал за околу 50 отсто. Голем е и растот на Србија, од 683.000 во 2010 година на 922.000 во 2013 година, за околу 25 отсто, како и на Босна и Херцеговина, од 365.000 на 529.000 посетители, или за 32 отсто. Другите земји имаат стабилни бројки, без големи промени. Оние што имаат излез на море сѐ уште се неспоредливо попосетени од другите, но фактот што најголемиот раст е забележан во Македонија, Србија и во Босна и Херцеговина укажува дека се зголемува интересот и за други видови туризам во регионот.
На Македонија ќе ѝ треба да го задржи брзиот раст за да ја зголеми вкупната бројка на посети. Според овој податок, има само неколку земји во Европа што се зад неа, како Молдавија, Белорусија и Сан Марино. Разликата е што Белорусија, и покрај тоа што имала речиси тројно помалку туристи од Македонија, успеала од нив да извлече речиси тројно повеќе пари.
Инаку, најпосетена балканска држава е Турција, во која влегуваат по 30-40 милиони странци годишно, односно речиси 140 милиони во изминативе четири години. Со тоа, таа е една од десетте најпосетени земји во светот, завршувајќи ја 2013 година на шестото место, пред Германија, Велика Британија и Русија. Таа е далеку пред Грција, Хрватска и Бугарија, кои се следни на листата на Балканот.

ФРАНЦИЈА НАЈПОСЕТЕНА, АМЕРИКА НАЈЗБОГАТЕНА

Главна вест од годинашниот извештај e дека Франција им ја одзела на САД титулата на најпосетена земја во светот. Французите во 2012 година привлекле 83 милиони гости (бројките за 2013 година сѐ уште не биле обработени), додека во САД регистрирале 66,7 милиони посети во 2012 година и 69,8 милиони во 2013 година. Во првите десет влегуваат и Шпанија, Кина, Италија, Турција, Германија, Велика Британија, Русија и Тајланд. Но Американците, и покрај сѐ, успеваат да заработат најмногу пари од туризмот, дури 140 милијарди долари во 2013 година, далеку пред Шпанија на второто место со 60 милијарди и пред Франција со 56 милијарди долари.
Инаку, две години по ред во светот се регистрираат над една милијарда патувања, а растот во 2013 година, споредено со претходната, е за цели пет отсто. Кинеските туристи лани потрошиле 129 милијарди долари во странство, со што се најголемиот извор на туристички приходи во светот. Во објаснувањето зошто туризмот е важен, од УНВТО истакнуваат дека тој сочинува девет отсто од вкупниот светски бруто-производ, а обезбедува едно од секои 11 работни места, 1.400 милијарди долари во извоз, претставува 6 отсто од вкупниот светски извоз и 29 отсто од вкупниот извоз на услужни дејности.


Вкупен број на посети во илјади
2010       2011    2012    2013    вкупно
Турција         31.364      34.654    35.693    37.795    139.506
Грција          15.007       16.427    15.518    17.923    64.875
Хрватска        9.111         9.927    10.369    10.925    40.332
Бугарија        6.047        6.328    6.541         6.827    25.743
Албанија       2.191         2.468    3.516               /      8.175
Црна Гора    1.088          1.201    1.284        1.324      4.897
Србија            683             764     810            922      3.179
БиХ                 356            392     439            529      1.716
Македонија     262             327    351            400       1.340
Белорусија      120             116    119            137          492
Сан Марино    120              156    139               /          415
Молдавија        64                75    89              96          324
Извор: УНВТО


Вкупна заработувачка во милиони долари
2010    2011    2012    2013    вкупно
Турција         22.585     25.054    25.345    27.997    100.981
Грција           12.742     14.623    13.416    15.930     56.711
Хрватска         8.259       9.211    8.812    9.255        35.837
Бугарија          3.637      3.967    3.748    4.059        15.411
Албанија         1.626       1.628    1.471    1.470         6.195
Србија               798          992       906    1.053         3.749
Црна Гора          732          862       826       884         3.304
БиХ                    594          631      622        689         2.536
Македонија         197        240       234        267            938
Белорусија          440         487      685        722         2.334
Молдавија           173        195      213         226           807