Манчевски: На 24 април нема можност за фер и демократски избори

Потпретседателот на СДСМ Дамјан Манчевски при денешната посета на Прилеп изјави дека за СДСМ на 24 април нема можност за фер и демократски избори. Кога ќе се создадат услови, нагласи, следниот ден може да има.

– Услови за фер и демократски избори на 24 април, за жал нема и тоа не може да се постигне физички. Ние сме подготвени за фер и демократски избори следниот ден кога ќе заврши пречистувањето на избирачкиот список и ќе се постигне договор за реформа во медиумскиот сектор. Во Македонија, кога и да се одржат изборите, ќе бидат фер и демократски. А ако се фер и демократски, ќе бидат мирни, изјави Манчевски.
Одговарајќи на новинарско прашање за последните мерки на СЈО, потпретседателот на СДСМ рече дека не ги коментираат одлуките на обвинителството, ниту на судот, а очекуваат партиите да ја поддржат работата на СЈО.
– Ние целосно ја поддржуваме работата на Специјалното јавно обвинителство. Ги повикуваме сите останати политички партии и чинители во општеството, да се држат до договорот и да ја поддржат работата на специјалното јавно обвинителство кое се формираше со поддршка и консензус на сите четири политички партии. Што се однесува до конкретните мерки, не ја коментираме работата на обвинителството, ниту пак на судските органи, изјави Манчевски.

Доколку преземете содржина од оваа страница, во целост сте се согласиле со нејзините Услови за користење.