Руската политика предизвикува потешкотии за голем број држави кои се соседи на Европската унија, изјави германскиот канцелар Ангела Меркел, пренесе МИА повикувајќи се на интервју објавено во весникот Велт.
– Молдавија, Грузија и Украина се три држави од нашата политика за источно партнерство кои потпишаа договори за асоцијација со ЕУ. Русија им создава потешкотии на тие три држави, вели Меркел.
– Освен тоа, гледаме дека Русија се обидува да ги држи зависни во економски и политички план држави од Западен Балкан, нагласува таа.
Во интервјуто Меркел ја потврди намерата доколку постои потреба да се даде воена помош на Естонија, Летонија и Литванија. Таа ја нагласи неопходноста од почитување на Член 5 од Договорот за НАТО односно обврската да се даде помош на секој партнер од Алијансата.
– Ете зошто на пример ние даваме поддршка за обезбедување на прибалтичкото воздушно пространство, создаваме нови сили за брза реакција и соработуваме со Данска и Полска, нагласи Меркел.