Милошоски: СДСМ има многу слаби кадровски решенија

Антонио Милошоски од ВМРО-ДПМНЕ во гостувањето во вестите на Телевизијата Алфа вели дека граѓаните очекуваат многу од стартот на новата Влада на претседателот на СДСМ, Зоран Заев, како што е 100.000 денари основица на лекарите, укинување на радиодифузната такса, зголемување на пензиите, 500 километри автопати, но од друга страна, СДСМ има многу слаби кадровски решенија.

„Ќе почнам со двете најблиски на премиерот Заев. Првото решение, шеф на кабинет е жена која што е осудена за службена проневера како царински службеник или заменик директор на Царинска испостава и има пресуда Основниот суд во Штип за тоа. Таа ќе биде неговиот најблизок човек“, истакна Милошоски.

Посочи дека доколку вашиот најблизок човек е некој кој одговарал за некаков шверц или злоупотреба на царински овластувања, тогаш, како што вели, може да замислите какво ќе биде натамошното опкружување.

„И второто, назначувањето на генералниот секретар на владата, господинот Драги Рашковски“, додаде пратеникот од ВМРО-ДПМНЕ, додавајќи дека Рашковски има изјава во која вели дека НАТО е организација која што бомбардира, убива цивили и помага терористи.

„Значи, се гледа дека ова е една селотејп коалиција во која личните бизнис, па и некои криминогени интереси на различни групи и етнички прашања биле составени на едно место, се со цел да ја турнат владата на ВМРО-ДПМНЕ без разлика на слабите кадровски потенцијали кои што ги нуди“, потенцира Милошоски.

Според него, гафот на министерот за финансии Драган Тевдовски е еден сериозен гаф.

„Разликата меѓу бруто и нето, без разлика дали се работи за цена или за ДДВ или за друга мерка којашто треба да ја пресметате во бруто или во нето исход, е нешто што студентите по економија го учат во првата година на студиите на Економскиот факултет, а слушнавме дека министерот таму предава, посочи високиот партиски функционер“, додавајќи дека тој треба да се врати на Факултетот и повторно да научи тоа што не го знае, или треба да размисли дали е способен да го води Министерството за финансии со такви базични непознаавања на овие состојби.

Доколку преземете содржина од оваа страница, во целост сте се согласиле со нејзините Услови за користење.