Најдефицитарната позиција сезонава кај вардарки беше онаа на линијата од шест метри, особено по повредата на Шпанката Бегоња Фернандес. Сега клубот реши истата да ја засили, и тоа со младата хрватска ракометарка Андреа Човиќ (21).
Досегашната членка на Подравка, која викендов го освои Купот на Хрватска и беше прогласена за најдобар играч, притоа постигнувајќи и 10 гола, реши да ја прифати понудата од Скопје и да се приклучи на моќниот тим на Вардар, каде веќе има повеќе млади ракометарки со голем потенцијал пред себе.
Од македонскиот првак потврдуваат и дека Шпанката Бегоња Фернандез на крајот од сезонава заминува, бидејќи ѝ завршува договорот. На пикерската позиција треба да останат Ања Алтхаус и Ивана Гакидова.
Човиќ е родена во Сињ на 9 октомври 1993 година, а од 2008 година е дел на тимот од Копривница. Ги мина сите младински селекции на Хрватска, а сега е на списокот на селекторот Горан Мрѓан и во сениорската репрезентација.
Освен титулите и куп трофеите со Подравка во првенството на Хрватска, Човиќ од 2009 година игра и во Лигата на шампионите. Сезонава постигна 12 гола, а најмногу 5 токму против Вардар во Скопје.
Во 2008 година со кадетската репрезентација на Хрватска го освои златниот медал од Медитеранските игри. Со сениорките има и бронзен медал од Медитеранските игри во Мерсин, во 2013. Беше и на поширокиот список за ЕП 2014 година.
Квалитетот на Човиќ беше препознаен и од страна на ЕХФ, во 2013 година, кога беше номинирана за најдобра млада ракометарка во Европа.
Извор: Спортмедиа.мк
