четврток, 1 декември 2016  |  Вести денес: 61

МЗ: Финансиските средства за лицата со ХИВ/СИДА не се намалуваат, туку се зголемуваат!

Им порачуваме на СДСМ да не се служат со лаги и манипулации со кои тенденциозно ја доведуваат во заблуда македонската јавност и намерно креираат лажна перцепција за финансиските средства кои државата ги издвојува за оваа особено чувствителна група на пациенти.

mz-foto

Последни вести

Во интерес на објективно информирање на јавноста, потенцираме дека Министерството за здравство обезбедува финансиски средства за лицата со ХИВ/СИДА во рамки на две програми на Министерството – Програмата за заштита на населението од ХИВ/СИДА во Република Македонија (во која за 2017 година се предвидени 27 милиони денари) и Програмата за здравствена заштита на лица со болести на зависности (во која за 2017 година се предвидени 25 милиони денари само за оваа намена – набавка на лекови за Хепатит Ц). Вкупниот износ на средствата за оваа намена од двете програми е 52 милиони денари, што значи дека во споредба со оваа година, финансиските средства за лицата со ХИВ/СИДА не само што не се намалуваат, туку напротив се зголемуваат, стои во реакцијата на Министерството за здравство на изјавата од СДСМ за Програмата за лица со ХИВ/СИДА.

Во продолжение целосното соопштение на МЗ:

СДСМ намерно креира лажна перцепција дека се намалуваат финансиските средства за оваа категорија пациенти, а во реалноста тие се зголемуваат.

Во оваа прилика, им порачуваме на СДСМ да не се служат со лаги и манипулации со кои тенденциозно ја доведуваат во заблуда македонската јавност и намерно креираат лажна перцепција за финансиските средства кои државата ги издвојува за оваа особено чувствителна група на пациенти. Реалните факти покажуваат дека се зголемуваат финансиските средства за лицата со ХИВ/СИДА во рамки на програмите на Министерството за здравство, односно за претстојната 2017 година Министерството издвојува повеќе средства во споредба со средствата за изминатава година.

Потенцираме дека Министерството за здравство во континуитет ги обезбедува потребните лекови за лицата заболени од ХИВ, и веќе е завршена набавката на лекови и за претстојната 2017 година, што значи дека за сите пациенти е обезбедена потребната терапија, како за тековната, така и за следната година.

Набавката ја спроведе Универзитетската клиника за инфективни болести, согласно потребите на пациентите, и се очекува потребните количини на лекови за 2017 година да пристигнат до крајот на тековната година. Овие количини на лекови за следната година ќе бидат исплатени од финансиски средства од Програмата за заштита на населението од ХИВ/СИДА во Република Македонија за 2016 година. Тоа значи дека средствата од Програмата за 2017 година ќе бидат целосно наменети за превентивни активности предвидени во Програмата.

Според информации од Универзитетската клиника за инфективни болести веќе е во тек постапката за набавка и на тестови за антиретровирусна терапија за 2017 година, кои на почеток на следниот месец се очекува да бидат испорачани, со што, како и досега, се обезбедува целосна покриеност и од аспект на откривање евентуални нови пациенти и следење на терапијата кај постојните пациенти.

Најчитани вести