„Еј, Влатко, те гледав на телевизија. Топ си! На мојата тезга ќе се фотографираш? Ќе земеш од продуктите да зготвиш нешто здраво?“
Вака го поздравуваа готвачот Влатко Огненовски, кој овој период е најмногу препознатлив по кампањата за здрава храна. Додека го фотографираме на еден од скопските зелени пазари, многумина доаѓаа да се поздрават со него, да разменат збор-два, а пазарџиите да му понудат нешто од своите продукти.
Во „Шпајзот на Македонија“ тој подготвува многу вкусни и здрави рецепти кои ги готвеле нашите прабаби. Чаеви од билки кои растат насекаде околу нас, лебови од ’ржано или интегрално брашно, пити, салати, макала, манџи од мешункасти плодови.
- „Шпајзот на Македонија“ е дел од кампањата за здрава храна. Тоа се едукативни видеоспотови, а идејата потекна од алармите кои доаѓаат директно од клиничките центри во Македонија. Се појавуваат дијагнози кај млади кои не кореспондираат со нивната возраст. Целата наша нација е засегната од оваа кампања. Се собравме повеќе ентузијасти. Јас сум во делот на кулинарските вештини како правилно да се приготви храната. Во кампањата се ангажирани врвни експерти, нутриционисти, доктори. Ова не е ТВ-кулинарско шоу, целта е да допреме до свеста на луѓето во врска со здравата храна. Засега има позитивен одѕив – објаснува Огненовски за идејата за „Шпајзот на Македонија“.
Според него, алармот од оваа кампања прво треба да стигне до градинките. Тој смета дека многу полесно се прифатливи промените кај помладите бидејќи тогаш полесно се менуваат навиките во исхраната.
- Една национална кујна се формира со сè што може да се скине од почвата и со многу фантазија. Ние готвиме со сè што расте на македонската почва. Македонија има многу добри предиспозиции. Ние сме земјоделска земја, во чија почва виреат многу зеленчуци и овошја. Македонија сè уште е во еколошки здравите зони. Нам ни е потребно само да се свртиме кон традицијата и да разбереме дека тоа што се служи во рестораните не е македонска кујна. Скарата не е македонска национална кујна. Тоа не е готвење, тука нема кулинарска вештина. Затоа треба да се вратиме на старите рецепти, како макала, манџи, ’ржани, интегрални лебови, пити. За мене, старата кујна по селата е таа што денес во светот се обележува со пет ѕвезди. Имаме многу запоставени рецепти кои планираме да ги освежиме и да почнеме повторно да готвиме така. Секаде постои еволуција, па така и во кујната. Потребно е само да имате идеја и креација. Креативните личности се тие што ја основаат кујната во едно општество – смета Огненовски.
Здрава храна е секоја храна што е набавена и приготвена правилно и што се консумира во одредени часови од денот. Безредието во исхраната, исто така, е нездраво, колку и да се здрави продуктите. Во основата на здравата храна влегуваат три компоненти: правилна набавка, здрави продукти и правилен начин на приготвување и точно време на консумирање.
- Од здравата храна може да јадете количински повеќе и таа е многу вкусна за тој што знае да ја приготви. Нашите зелени пазари имаат изобилство на храна, и тоа треба да нè освести. Едно врзопче зелје е 10 денари, го има цело лето, а никој не го купува. Кога пред една деценија имав свој ресторан, дојдов до заклучок дека само странците ни го јадат зеленчукот. Пред десет години на тезгињата немаше рукола, жалфија, сега, за среќа, во изобилие ги имаме сите ароматични тревки на планините. Се враќа и маџунот на трпезите. Ако се храниме здраво, ќе имаме здрава нација. Ете, толку е едноставно – вели Огненовски.
Неговото најомилено јадење е пинџур од црвени пиперки, домати, лук и маслиново масло.
- Ние маслиновото масло, како култура, не сме го имале во изобилство, во минатото повеќе се готвело на свинска маст, која е многу поздрава ако се консумира во помали количини, за разлика од хемиски модифицираните масла за јадење – вели Огненовски, кој се вљубил во кулинарството во Италија, а занаетот го учел од врвни готвачи – Дучо Лоренцини, кој е благородник, и Лука Черетани, професор по тосканска кујна во Сиена.
- Тие двајца ми ја развија љубовта кон готвењето – вели нашиот соговорник.
Готвењето е уметност, процес кој постојано се учи и се надградува. Секогаш има нов вкус, нова комбинација. Со готвење две тревки, се произведува трет мирис кој навидум не личи ниту на едната ниту на другата тревка. Во готвењето има хемија, физика, математика, медицина… и да, многу љубов е вплеткано во сето тоа.
- Сите сме убедени дека ја познаваме Македонија, но тоа не е точно. Од многу места каде што бевме додека снимавме, јас бев воодушевен и не бев свесен дека се наоѓам во Македонија. Најмногу ме воодушеви планината Кожуф. Таа е една дива планина, во која има сè. Има живот даден од природата. Влегов во една длабока букова, дабова, иглолисна шума, каде што се вчудовидов што сè дала мајката природа. Тоа е божји дар кој не го користиме. Таму има повеќе видови вргањ, капини, диви јагоди, едвај ме извадија од шумата. Сфатив дека тоа е шпајзот на Македонија – раскажува Огненовски.
Тој советува да се исфрлат од исхраната запршките, како и шеќерните табли кои помладите ги јадат во големи количини.
- Ние како нација сме многу блиски, поврзани, се сакаме и се почитуваме едни со други. Бабите многу нè сакаат, но мора да се освестат и да престанат да им купуваат на децата шеќерни табли. Чоколадо е една работа, а шеќерни табли со растително масло се сосема друга работа. Кога нив би ги скокнале во исхраната, нацијата би била многу поздрава – смета Огненовски.
Тој е свесен и за реакциите во јавноста дека храната што ја приготвува е скапа.
- Ајде да направиме математика: едно чоколадо од 100 грама чини во просек 60-70 денари. Значи, еден килограм чоколадо чини 700 денари. Колку овошје може да се купи за 700 денари? Имам предлог-план кој ќе го презентирам во иднина како може за малку пари да се јаде здраво. Појадокот е голем проблем на Македонците. Мислам дека поголемиот дел од нас појадува неправилно. Мој предлог за појадок е неколку вида суво овошје – кајсии, сливи, смокви со сварена пченица, овес или трици, јогурт и една лажица маџун. Поубав појадок здравје! Ниту рафиниран шеќер, брашно, млечни производи со сомнителен квалитет – препорачува Огненовски.
Преземено од Република