Мигрантите на граничен премин Брегане на хрватско-словенечката граница беа пуштени во Словенија и изутринава таму нема повеќе мигранти, јавија хрватските медиуми, објави МИА.
Откако Словенците синоќа го затворија преминот, тие испратија три автобуси, кои превезуваа словенечки активисти и дел од мигрантите, кои беа блокирани на преминот. Во текот на ноќта пристигнаа уште автобуси, кои ги превезуваа и останатите мигранти.
Граничниот премин Товарник на хрватската граница со Србија денеска исто така е празен. Сите пристигнати мигранти се префрлаат во кампот Опатовац.
Околу две илјади мигранти ја минаа синоќа пеш хрватската граница со Унгарија кај Терзино Поле. Тие беа донесени со околу 20 автобуси во близина на границата, а хрватската полиција ги спроведе пеш до границата, по што на средината на мостот ги презеде унгарската полиција.
Од околу три илјади мигранти, кои досега влегле во Словенија азил побарале само седум.
