Македонија

Над илјада деца прегледани на дежурниот педијатриски пункт

Над илјада деца прегледани на дежурниот педијатриски пункт

Во дежурниот педијатриски пункт во поликлиниката „Јане Сандански“ во изминатите два месеца се прегледани над 1.110 деца и извршени над 1.200 лабораториски анализи.

Од Министерството за здравство посочуваат дека ангажираноста на специјалистите педијатри и добрата опременост на дежурниот пункт овозможува најголем дел од пациентите потребната здравствена заштита да ја добијат во пунктот, при што на 64 деца им била направена инхалација, а на 37 им била дадена ампуларна терапија.

Најголем дел од прегледаните деца биле со горнореспираторни инфекции, фебрилни состојби и цревни инфекции. По направениот преглед, 82 деца биле упатени на терциерно ниво, од кои најголем дел односно 26 на Клиниката за детски болести, во Институтот за белодробни заболувања кај деца-Козле 17, во ГОБ „8 Септември“ и Детска хирургија 15, на Клиниката за инфективни болести 12, на Клиниката за уво, нос и грло девет деца, на Клиника за очни болести две и едно било упатено на максилофацијална хирургија.

Дежурниот педијатриски пункт во поликлиниката „Јане Сандански“ функционира од 9 јануари годинава и во него се ангажирани педијатри од Клиниката за детски болести, Институтот за белодробни заболувања кај децата-Козле, Здравствениот дом Скопје, како и педијатри кои имаат договор со Фондот за здравствено осигурување на Македонија како приватни здравствени установи.

Пунктот работи секој ден, од понеделник до сабота во периодот од 19:30 до 23 часот и во недела од 8 до 23 часот.