Надвор од памет било прифаќање „ерга омнес“ и промена на уставното име

Премиерот Зоран Заев, вечерва во емисија на Канал 5, истакна дека претходната влада на Никола Груевски, во преговорите со Грција прифатила промена на името на државата во Горна Македонија и тоа за севкупна употреба.

Груевски на својот Фејсбук статус објави дека владата на ВМРО-ДПМНЕ разговарала за надминување на разликите околу името како што не обврзува резолуцијата на ООН, но не го променила името и идентитетот цели 11 години.

Во продолжение ви го пренесуваме ФБ статусот во целост:

Најдобар демант за она што го говори Заев е факторот време. Тој фактор покажува дека јас и ВМРО-ДПМНЕ разговаравме за надминување на разликите околу името како што не обврзува резолуцијата на ООН, но не го променивме името и идентитетот цели 11 години.

А тој прифати и спроведува промена на името „ерга омнес“ со промена на Уставот што недвосмислено влијае на менување на идентитетот. И со многу отстапки во договорот кои никогаш не биле предмет на разговор, а камоли отстапка.

Надвор од памет било да се прифати „ерга омнес“, што значи и промена на името во Уставот со име Северна или Горна или било каква Македонија. Па уште и сум се откажал од идентитетот. Само името на автопатот ги изнервирало Грците и затоа ја пропуштиле таа можност.

Ваков договор, со вакви елементи во него, со вакви отстапки во членовите на договорот, не сум ни можел да прифатам, бидејќи дел од прифатените работи не се ни барале од другата страна.

Сакаат да дефокусираат. Да зборуваме за се, само не за овој договор кој навистина е национална катастрофа.

Еве само еден пример. Според договорот на Заев, татко ми кој е роден во Леринско, 15-тина километри од денешната границата, е дел од историјата за која Грција доби експлузивно право со договорот и има право својот идентитет меѓудругото да го влече и од тој дел на историјата, а јас негов син, кој сум роден од другата страна на границата немам такво право. И така е и со илјадници други Македонци, не само оние со потекло од тој дел на Македонија. И со оние со потекло од овој дел на Македонија.

Кој е тој научник кој административната граница денес, ја претвори во историска и идентитетска граница.

И такви нелогичности има еден куп во овој договор.

Доколку преземете содржина од оваа страница, во целост сте се согласиле со нејзините Услови за користење.