Во официјалната биографија на државниот секретар на Министерството на правда Зулфи Адили, кој е поранешен пратеник на ДУИ, а потоа и на Унитети, меѓу другото стои податокот дека бил член на генералниот штаб на паравоената ОНА, која го иницираше конфликтот во земјава во 2001 година, пишува Независен весник.
Во биографијата, меѓу другото, се ситакнува дека Адили е еден од основачите на Здружението на ветерани на ОНА, како и дека во 2002 година бил активен во координативниот совет на ОНА со политичките партии ПДП, ДПА и НДП, во 2007 година дипломирал на Правниот факултет на Универзитетот во Тетово, на студиите коишто ги започнал во 1999 година, а во 2003 година ги минал курсевите за лидерство на УНДП.
Инаку досега не беше практика државни функционери, главно од редовите на ДУИ но и од други партии од албанскиот блок, во своите службени биографија да наведуваат податоци за тоа дека членувале во паравоената ОНА. Тој податок го нема ниту во биографијата на Адили додека беше пратеник во претходниот собраниски состав.
Адили е именуван за државен секретар како функционер на партијата Унитети, која ја основаше со Г’зим Острени, поранешен командант на ОНА и ОВК, а која на изборите беше во коалицијата Алијанса за Албанците, предводена од Зијадин Села.
Инаку, државните секретари во министерствата ги именува Владата и нивниот мандат трае колку и мандатот на владиниот кабинет.
