Нападнати полицајаци во Гостивар

Нападнати се полициски службеници вчера во Гостивар додека извршувале службени обврски, соопшти СВР Тетово.

Едниот напад е регистриран околу 11:30 часот на улицата „Браќа Ѓиновски“, а другиот околу 19 часот на крстосницата меѓу улиците „Браќа Ѓиновски“ и „ЈНА“. Насилниците се Ј.И, (21) и К.М. (23), двајцата од Гостивар. Тие се веќе приведени и против нив ќе биде поднесена соодветна пријава.

– Двајца полициски службеници од Надворешната канцеларија за криминалистички работи, се физички нападнати од 21-годишниот гостиварец Ј.И, познат сторител на кривични дела. Ј.И. најпрво се нафрлил на едниот, а потоа и на другиот полициски службеник, по што е приведен во Полициската станица Гостивар. Потоа, околу 19 часот, и К.М. кој претходно бил сопрен додека управувал патничко возило „БМВ“ со странски регистерски таблици, го нападнал дежурниот полицаец, изјави портпаролот на СВР Тетово Марјан Јосифоски.

К.М. одбил да покаже документи и дал активен отпор, при што на полицискиот службеник му нанел видливи повреди, кинејќи му ја униформата. Набрзо е лишен од слобода, задржан во Полициската станица Гостивар и против него ќе следува поднесок.

Од почетокот на годинава во полошкиот регион се регистрирани четири вакви напади, два во Тетово и два во Гостивар. Имало и 16 случаи на навредување и омаловажување полициски службеници, седум во Тетово и девет во Гостивар, а сторителите се соочиле со прекршочни пријави.

Доколку преземете содржина од оваа страница, во целост сте се согласиле со нејзините Услови за користење.