Премиерот Никола Груевски на денешната седница посветена на пратенички прашања, меѓу другото говореше и за реализација на попис на население во државата.
Имаме намера да спроведеме попис на население во Македонија. Ги правиме сите напори да спроведеме попис според највисоки меѓународни стандарди, попис што нема да влее сомнеж кај никого, кај ниту една етничка заедница, кај ниту еден граѓанин, индивидуалец, политичка партија или кој било друг субјект, рече Груевски одговарајќи на прашање на пратеничката Роза Топузова Каревска, пренесе МИА.
Во меѓувреме се работи на подготовките за попис на население
Како што посочи премиерот, во меѓувреме подготовките за спроведување на попис на население се одвиваат во два правци – во правец на електронско поврзување на матичните евиденции за во најголем дел пописот да биде електронски и во таа насока веќе има резултати.
Очекуваме до крајот на оваа година да пристигне целокупната потребна опрема за поврзување на сите што постојат матични евиденции во Македонија и со тоа нашите проценки се дека околу 70 проценти од прашањата за пописот би биле електронски одговорени односно нема да треба да бидат поставувани прашања до граѓаните туку софтверски, компјутерски со електронско поврзување на матичните евиденции ќе се соберат сите потребни одговори, рече Груевски.
Тој потенцира дека исто така се прават подготовки и за оној дел кој ќе биде рачно теренски направен, односно, оние преостанати 30 проценти кои ќе треба теренски да бидат поставени како прашања на граѓаните.
Клучна работа – Да се направи електронска проверка на биометриските податоци
Клучната работа во овој дел е да се изврши набавка на т.н. fingerprint или електронска проверка на биометриските податоци на тој што треба да се попише за да се потврди дека тој е во земјата и дека тој е тој кој го дава одговорот на прашањето. Без такво нешто секогаш би имало сомнежи дали навистина човекот што требало да одговори одговорил, дали одговорил некој друг итн., потенцира Груевски.
Груевски појасни дека се разработува една поширока анализа и шема како да се комплетира проектот кој подоцна би поминал на владина седница и би се реализирал. Како што рече, тој проект е во фаза на подготовка.
Значи, ги правиме сите напори да подготвиме изведба на попис по највисоки меѓународни стандарди, попис којшто нема да влее сомнеж кај никого и за којшто во секој момент ќе може да се обезбедат докази дека навистина тој кој ги дал одговорите е лицето кое е запишано, попис кој ќе биде на терен помалку оптоварувачки и за анкетарите и за оние кои ги одговараат прашањата бидејќи ќе имаат значително помал број прашања што ќе треба да ги постават затоа што поголем дел од прашањата ќе бидат електронски преземени од матичните евиденции кои постојат, додаде премиерот Груевски.