Научивме дека треба да учиме од историјата, а не да ја повторуваме

Колку убав и величествен историски ден, нека ни е со среќа, рече денес во Нивици/Псарадес, во Преспа пред потпишувањето на договорот за промена на името меѓу Македонија и Грција премиерот Зоран Заев. Своето обраќање Заев го започна со парафразирање на мисли од Аристотел, а го заврши со тоа дека е горд на фактот што се става крај на еден тридецениски спор.

„Дозволете ми да парафразирам две мисли од Аристотел. Нема да можеш да постигнеш ништо без храброст и надежта е буден сон. Овие две мисли говорат дека кога има надеж и храброст можеш да поместиш планини. Со потпишувањето на овој договор навистина поместивме планини. Кога многумина се сомневаа, потврдивме дека е возможно. Ставаме крај на еден спор. Прашањето беше отворено три децении. Затоа јас и Ципрас и министрите за надворешни работи заедно со нашите претставници, тргнавме во потрага по решение и стигнавме до решение”, рече Заев во своето обраќање пред потпишување на договорот со Грција.

Три децении решаваме спор, но за мене е важно дека овие три децении не научија на нешто многу важно.

„Научивме дека треба да учиме од историјата, а не да ја повторуваме. На темелите од минатото градиме иднина. Со овој договор добиваме охрабрување и аспирација за поголема доверба меѓу двете земји. Решението и процесот низ кој поминавме ни донесе пријател. Ќе бидеме партнери и сојузници. Добиваме нова реалност”, рече премиерот Заев.

Горди сме на овој наш договор затоа што се обединивме околу еден наш спор кој не делеше, го заврши Заев своето обраќање.

 

Доколку преземете содржина од оваа страница, во целост сте се согласиле со нејзините Услови за користење.