Македонија

Ни Шиповиќ неможе да го издржи луксузирањето на кадрите на Жерновски

Ни Шиповиќ неможе да го издржи луксузирањето на кадрите на Жерновски

Претседавачот на Советот во Општина Центар, Мирослав Шиповиќ, вчера на градоначалникот Андреј Жерновски на седницата закажана за советнички прашања му постави незгодно прашање: зошто вработените го користат опшинското службено возило за лични потреби, објавува порталот „Плусинфо“.

– Со кој пропис се користат службените возила за приватни цели. Секретарот секој ден го гледам со општинското возило си оди дома после работа и наутро со истото се враќа? – праша претседавачот кој е дел од партиската коалиција на власта во оваа општина.

Жерновски на тоа одговори дека доколку е така, треба да се реагира.

– Ако има таква злоупотреба, тогаш треба да се реагира. Се согласувам. Не смее после 16 часот да се користат возила кои се тука за службена употреба – одговори тој.

Шиповиќ постави прашање и за катната гаража кај Судска палата која беше изградена за време на претходното раководство. Забележувајќи дека објектот се наоѓа во лоша состојба со низа оштетувања, претседавачот праша и зошто не е во функција.

Градоначалникот одговори дека дури сега можат да се увидат грешките во изградбата, а претставник од службите рече дека врнежите направиле голема штета во објектот изминативе месеци.

– Внатрешно и надворешно објектот е сè уште под гаранција. Причините се знаат, лоша изведба на кровот и на изолацијата. Но, затоа што сè уште е под гаранција, стапивме во контакт со изведувачот и наскоро ќе почне санацијата – рече службеникот.