Претседателот на Србија, Томислав Николиќ, изјави денеска дека Хрватска не успеала да докаже геноцидни намери на српската страна во воените судири, а од друга страна, иако противтужбата на Србија не е усвоена, потврдено е дека Хрватска направила масовно злосторство кон Србите.
Николиќ во обраќањето до јавноста по пресудата на Меѓународниот суд на правдата во Хаг за тужбата и противтужбата на Хрватска и Србија за геноцид рече дека тој суд пресудил дека Хрватска во својата тужба не успеала да докаже геноцидни намери на Србија.
– Иако противтужбата на Србија не е усвоена, МСП утврди дека хрватските власти биле свесни дека воeната акција „Бура“ ќе доведе до протерување на цивилното население. На овој начин, и од страна на највисоката правна институција на ОН потврдено е дека хрватските сили извршиле масовни злосторства врз Србите во Хрватска, рече Николиќ, пренесува Танјуг.
Тој оцени дека и покрај неправдата направен е охрабрувачки чекор.
– Искрено се надевам дека во времето кое е пред нас ќе има доволно храброст за Србија и Хрватска во добра вера заедно да ги решаваат сите проблеми кои го мачат регионот и кој ќе го воведеме во период на траен мир и просперитет, заклучи Николиќ