Норвешка планира да распореди вооружена единица на арктичката граница со Русија, но и да купи тенкови и артилерија како одговор на зголемената опасност.
Министерката за одбрана Ине Ериксен Сореид, при денешното образложување на планот не ја спомена директно Русија и потенцираше дека Норвешка во моментов не е соочена со конкретна воена закана.
– Безбедносната ситуација е се помалку предвидлива и со се повеќе предизвици. Тоа влијае на организацијата на војската, изјави министерката пред новинарите.
Членките на НАТО, но и соседните земји, изразуваат се поголема загриженост од амбициите на Москва, посебно по анексијата на Крим и руските копнени и воздушни воени вежби во регионот, коментираат западните медиуми.
Владата на Данска вчера соопшти дека во следните пет години сака да го зголеми одбранбениот буџет за 20 отсто, како одговор на зајакнатата воена активност на Русија во источниот и северниот дел на Европа.
Тоа вклучува основање нова бригада од 4.000 војници, која би дејствувала во балтичкиот и нордискиот регион, би била опремена со против-воздушни ракети, тенкови, артилерија и противподморнички средства.
