Спорт

Француско фудбалско првенство Нова „петка“ на ПСЖ, важна победа на Сент Етјен

Нова „петка“ на ПСЖ, важна победа на Сент Етјен

Откако во првиот дуел од осминафиналето во Лигата на шампионите беа поразени во Мадрид од Рреал со 1:3, фудбалерите на Пари Сен Жермен рутински ја одработија средбата од 26-то коло од француското првенство победувајќи го на „Паркот на принцовите“ Стразбур со 5:2.

Гостите поведоа уште во шестата минута со голот на Жан Аолу, но ПСЖ до полувремето направи пресврт постигнувајќи три гола. Стрелци беа Јулијан Дрекслер во 10 Нејмар во 21 и Анхел ди Марија во 22 минута. Стефан Баокен намали во 67 минута, но следеа два гола на Единсон Кавани во 73 и 79 минута, за конечните 5:2. Кавани така стаса од 23 голови во првенството оваа сезона, четири повеќе од Нејмар.

На табелата води ПСЖ со 68 бодови, на второто место е Монако со 56 бодови, Марсеј има 52, а Лион 48 бодови, но Марсеј и Лион имаат по меч помалку. Стразбур е на 14-то место со 30 бодови.

Дербито на дното од табелата, Сент Етјен на гостувањето го совлада Анжер со 1:0, а решавачкиот погодок го постигна во 79 минута Роберт Берич. Анжер остана на претпоследното 19-то место со 25 бодови, додека Сент Етјен го продолжи бегството од зоната на испаѓањето и моментално е 11-ти со 33 бодови.

Троа го совлада отпишаниот Мец со голот на Ниане во 88 минута. Троа е 15-та со 27 бодови, а Мец останува закотвен на последната позиција со само 18 бодови.

Амиен и Тулуз ремизираа без голови. Амиен е 17-ти со 26 бодови едно место зад Тулуз со бод помалку.

Без победник заврши и средбата меѓу Монпелје и Гингамп. Гостите кои се на 10-то место со 34 бодови, поведоа во 29 минута од пенал кој го реализираше Н’Гбакато, додека домашните израмнија во 73 минута со голот на Сио и сега се на петтото место со 38 бодови.

Ремизираа со резултат 2:2 и Каен и Рен. Кривели ги доведе во водство домашните во 6 минута, но три минути подоцна гостите израмнија преку Сако, а во 21 минута истиот играч направи целосен пресврт на резултатот, а домашните израмнија во 84 минута преку Да Силва. Каен има 32 бодови на 12-то место, додека Рен е осми со 35 бодови.

Претходно во петокот Монако го совлада Дижон со 4:0, по што гостите останаа на 13-то место со 31 бод.

Во недела играат Ница – Нант, Лил – Лион и Марсеј – Бордо.