Ветуваме за компаниите нови 100 милиони евра кредити со субвенционирана камата од пет ипол отсто, истакна на вечерашниот митинг во Струмица лидерот на ВМРО-ДПМНЕ Никола Груевски, кој ја промовираше партиската програма.
„Ова беше еден од клучните чекори што ги направивме за време на кризата. Кога сите очекуваа, кога почна светската криза и европската должничка криза дека каматите на кредитите ќе пораснат на 10 и 15 отсто затоа што така беше во другите држави, ние владиниот тим најдовме решение за изнаоѓање на кредитни линии и за нивно субвенционирање, па наместо 10 или 15 отсто фирмите почнаа да плаќаат пониска камата и од таа што ја плаќале пред да започне кризата. Со цел да помогнеме во време на кризата да не дојде до отпуштање на вработените и со тоа зголемување на невработеноста“, посочи Груевски.
Тој нагласи дека таа стратегија успеала и наместо да расте невработеноста, сред криза со субвенционирани камати, таа се намалила.
