Посебен додаток ќе добиваат децата со цистична фиброза и од пред една недела тие можат веќе да аплицираат до Министерството за труд и социјална политика, информираше во текот на вчерашниот ден лидерот на ВМРО-ДПМНЕ, Никола Груевски.
Од Здружението за цистична фиброза ја поздравуваат одлуката на Владата за поделба на посебниот додаток по социјални категории. Според нив тоа е правилно решение и ќе значи многу за родителите на деца со цистична фиброза, а пред се за социјално загрозените семејства, особено самохраните родители.
„Ја поздравувам одлуката на Владата за поделба на посебниот додаток по социјални категории. Сметам дека тоа е правилно решение, бидејќи станува збор за социјален пакет и поддршка и секако истиот поинаку го чувствуваат социјално загрозените семејства, особено самохраните родители. Бидејќи, ние како Здружение сеуште не сме добиле официјална информација колкава ќе биде висината на основниот пакет, не би можам да кажам дали висината на тој додаток ќе биде доволна за покривање на дополнителните трошоци кои ги имаат родителите чии деца страдаат од цистична фиброза“, вели во изјава за Нет Прес, Снежана Бојчин од Здружението за цистична фиброза, која додава дека било какво зголемување на висината на основниот пакет позитивно ќе влијае врз животите на оваа категорија на болни деца.
Додатокот, како што појасни лидерот на владејачката партија, нема да биде ист за сите, oдредена сума е за оние кои се материјално обезбедени, за 30 проценти е поголем додатокот за оние кои не се материјално обезбедени, а за 15 до 20 отсто уште поголем за самохраните родители. Посебниот додаток за дете со специфични потреби кое има пречки во телесниот, менталниот развој или комбинирани пречки во развојот до 26 години изнесува 2.366 денари. Посебниот додаток за материјално необезбедените родители на деца со пречки во развојот изнесува 5.457 денари, право кое во јуни 2015 година беше зголемено за 25 отсто. Владата за 50 отсто го зголеми и износот на посебен додаток за самохрани родители на дете со пречки во развојот кој сега изнесува 6.303 денари.
Груевски истакна дека воведувањето на нов додаток за децата со цистична фиброза, било иницирано за време на неговите посети на терен.
„Имаше барања и иницијативи од граѓани во честите мои одења на терен. Разговарав со министерот за труд и социјална политика Диме Спасов кој позитивно реагираше и го промени правилникот со кој ја додаде оваа дијагноза во групата кои примаат посебен додаток. Така што од пред една недела е овозможено родителите на тие деца да можат да аплицираат за посбен додаток кој е градиран. Одредена сума е за оние кои се материјално обезбедена, за 30 отсто е поголем додатокот за оние кои не се материјално обезбедени и уште поголема за 15 до 20 отсто е поголем за самохраните родители“, посочи Груевски, одговарајќи на новинарско прашање при вчерашната посета на Стајковци.
Посебниот додаток кој го примаат родителите на децата со цистична фиброза, како што потенцираше тој, се воведува за првпат во Република Македонија.
„Тој додаток не постоеше никогаш во минатото, сега за првпат тоа се овозможи и јас се радувам што тоа е така затоа што ќе им се помогне на многу семејства. Многу од тие семејства се посиромашни и немаат можност да ги покријат трошоците коишто им се додатни трошоци заради здравствената состојба на нивните деца“, додаде Груевски.
Болеста цистична фиброза, како што појаснува Снежана Бојчин, е наследна, мултисистемска и животозагрозувачка и на директен или индиректен начин ги зафаќа речиси сите внатрешни органи кај болниот и кај 90 отсто од болните со цистична фиброза е целосно нарушена работата на панкреасот и неговото лачење на ензими за обработка на хранливите материи, затоа кај овие болни се јавува малнутриција и заостаток во растот кои дополнително го компликуваат текот на болеста.
За премостување на овие проблеми, како што вели таа, болните треба да примаат ензими како лек и истите имаат потреба од поголем внес на калории во текот на денот и тоа од 120 до 150 отсто за да се постигне истиот учинок како при нормален внес на храна кај здрав човек.
Со ова, како појасува Бојчин, трошоците за исхрана, во семејствата на болните се значително зголемени и самата потреба од редовни редовни месечни контроли во болница влијае на семејниот буџет за покривање на патните трошоци. Токму, затоа, како што посочува таа во изјавата за Нет Прес, посебниот додаток е многу е значаен дел од социјалниот пакет на поддршка на болните со цистична фиброза.