Министерот без ресор задолжен за привлекување странски инвестиции Веле Самак ги посети канцелариите на новo отворениот контакт центар во Скопје CMX Solutions, во сопственост на германската компанија VIOX-Dialog.
За време на посетата министерот Веле Самак оствари средба со Кристоф Ебнер, сопственик и генерален директор на германската компанија VIOX-Dialog и со Борка Илиевска, директорка на CMX Solutions во Македонија.
VIOX-Dialog е BPO (Business Process Outsourcing) компанија во доменот на давање на кориснички услуги со седиште во Франкфурт во југо-источна Европа. Компанијата неодамна одлучи својата нова експанзија да ја направи токму во Скопје.
Ново отворената македонска компанија CMX Solutions веќе вработи менаџерски кадар и објави огласи за вработување на 15 (петнаесет) контакт центар оператори со познавање на германски јазик на веб порталот www.fakulteti.mk . Согласно бизнис планот до крајот на 2015та година компанијата ќе вработи 100 лица со познавање на германски и англиски јазик за опслужување на тековни и идни клиенти. Догорочниот план на сопственикот е контакт центарот во Македонија да оддржи континуиран раст на операциите.
– Во Македонија ја идентификувавме атрактивната бизнис клима и млад кадар со одлични познавања на странски јазици кои ќе можат да го поддржат растот на нашите глобални операции“, изјави Ебнер.
Според министерот Самак ова е уште една потврда за зголемениот интерес на германските компании за инвестирање во Македонија особено во сервисната индустрија.
– Со отварање на вакви контакт цeнтри се развива овој сектор и се создаваат работни места за високообразовен кадар со познавање на странски јазици. Сите кои имаат познавање на германски и англиски јазик и сакаат да работат со странските пазари и клиенти имаат можност да се пријават на отворените огласи, вели тој.
Како следен чекор, компанијата CMX Solutions планира соработка со Филолошкиот Факултет „Блаже Конески“ – Скопје за создавање можности за пракса на студенти кои изучуваат странски јазици како дел од нивната редовна студиска програма.