Балкан

Обновени летовите на аеродромот „Ататурк“ во Истанбул

Обновени летовите на аеродромот „Ататурк“ во Истанбул

Летовите на меѓународниот аеродром во Истанбул „Ататурк“ беа обновени по прекинот од околу 24 часа поради неуспешниот обид за воен удар.

Како што пренесува МИА, летови од и до Истанбул вчера попладне извршуваа воглавно турските авиопревозници, додека другите авиокомпании сметаа дека им е потребен уште еден ден за да се уверат дека мерките за безбедност се целосно воспоставени.

Претходно националниот авиопревозник „Туркиш ерлајнс“ соопшти дека се обновени летовите од меѓународниот аеродром во Истанбул по неуспешниот обид за преврат во петокот вечерта, додека некои странски авиопревозници ги откажаа летовите во текот на викендот.

Портпаролот на „Туркиш ерлајнс“ изјави дека летовите повторно се извршуваа согласно редовниот распоред во третиот по големина аеродром во Европа, иако може да се очекуваат одредени доцнења.

Доцна синоќа авиони ловци повторно се појавија на небото над Истанбул. Турски официјален претставник, кој побарал анонимност изјави дека пет ловци Ф-16 патролираат во воздушниот простор на Истанбул.