Учеството на премиерот Никола Груевски на Самитот Вајбрант Гуџерат, еден од најголемите инвестициски собири во Индија, на кој учествуваат политичари, директори на околу 50 глобални светски компании, како и 30 водечки дипломати не помина незабележано од тамошните медиуми.
Највлијателните индиски медиуми пишуваат за глобалниот инвестициски самит на кое свое обраќање имаше и премиерот Никола Груевски . „Македонија е порта кон Европа, вели Никола Груевски“ е насловот на текстот објавен во индискиот весник „DNA“, каде е наведено дека помошта на Индија за време на светската економска рецесија била потенцирана во говорот на македонскиот премиер при неговото обраќање на церемонијата на Vibrant Gujarat Summit 2015 во неделата.
-Индија и помогна на светската економија кога таа се соочуваше со тешки времиња во периодот од 2007-2008 година. Во глобализираната околина, можностите не доаѓаат сами по себе, тие мора да се создадат преку иновација и конкурентност. Имаме раст на БДП од 3.9% во првите три квартали на 2014-2015 година. Ние сме местото во Европа каде најбрзо може да се започне бизнис. Македонија е земја која е отворена за нови бизниси, ја пренесува медиумот изјавата од Груевски.
Пред медиумите за време на вечерата Груевски истакнал: „Македонија е портата кон Европа. Има најниска цена на производство и најниски даноци во светот. Енергијата и логистиката се истотака најевтини во Европа, а цената на трудот е конкурентна. Ние бараме инвеститори кои произведуваат авто делови, електро делови, инвеститори во агро-преработката на храна како и во хемискиот сектор“.
„Тајмс оф Индија“ во текст објавен пред неколку часа по бизнис форумот во градот Ченаи пишува дека Македонија ги повикува индиските бизниси.
-Македонија е иделано место и порта за индиските компании каде можат своите производи од тука да ги понудат на 660 милиони потрошувачи, сетоа тоа како резултат на ниските даноци и добрата бизнис клима, Во комбинација на ниските цени на логистиката, енергијата и конкурентната работна сила, тоа ја прави Македонија идеално место за да се започне бизнис, истакна премиерот Никола Груевски на состанокот со локалните бизнисмени во организација на Конфедерацијата на индиската индустрија, пренесува „Тајмс оф Индија“.
Весникот додава дека Македонија е држава во југоисточна Европа со популација од речиси два милиони жители, која има три слободни економски зони и планови за развој на уште 10 во текот на оваа и следната година.
За време на трите дена од самитот, како што пишуваат индиските медиуми, се одржуваат повеќе презентаци од страна на земјите учеснички, дваесетина семинари, како и околу 700 меѓусебни средби на присутните претставници на компаниите, но и средби со владините претствници, на кои се очекува да стане збор за можни инвестиции.
Самитот, како што пишува дневниот весник Тајм оф Индија, се одржува во услови на досега невидени мерки за безбедност. Во Ахмадабад ангажирани се 12 илјади полицајци, меѓу кои и припадници на специјални единици, а на локацијата каде се одржува Вибран Гуџерат уште дополнителни 4.000 лица. Направени се и строги проверки на вработените во хотелите каде се сместени гостите. Со целата операција се раководи од три контролни центри.