Сите 29 обвинети лица за тероризам во кумановската „ Дива населба “ денеска пред Советот од судии од Основниот суд Скопје 1 се изјаснија дека се невини по обвинителниот акт, според кој на 9 и 10 мај годинава учествувале во нападот врз полицијата, пренесува МИА.
Обвинетите истакнаа дека не се чувствуваат виновни за делото „тероризам“.
Според обвинителот Наум Пановски, групата претходно извршила напад на полициската станица во Гошинце, од каде со украденото оружје се стационирала во кумановската „Дива населба“. Според обвинението, утрото на 9 мај кога пристигнале полицајците во населбата, дел од обвинетите кои биле во групата прво фрлиле бомба, а потоа со автоматско оружје и со снајпери пукале кон полицајците.
Во инцидентот загинаа осум полицајци од специјалните и посебните единици на МВР, додека четириесетина беа тешко повредени.
